2024-yilda 7 ta davlat organlarida 25 mingdan ortiq qonunbuzarlik holati aniqlandi

2024-yilda O‘zbekistonda nazorat qiluvchi organlar tomonidan qonunbuzarliklarni aniqlash va bartaraf etish, xodimlarning malakasini oshirish bo‘yicha katta hajmdagi ishlar amalga oshirildi. Ushbu jarayon davlat organlarining shaffofligini ta’minlash va samaradorligini oshirishga qaratildi.

Tekshiruvlar davomida jami 5 125 ta buyrutma berilib, ularning 57 foizi rad etilgan, 43 foizi esa kelishilgan. Shu bilan birga, 7 ta davlat organi va tashkilotlarida 25 mingdan ortiq qonunbuzarlik holati aniqlangan. Bu holatlar yuzasidan 929 nafar mansabdor shaxsga tegishli choralar ko‘rilgan. 

Nazorat qiluvchi organlar faoliyati

Xodimlarning malakasini oshirish maqsadida 5 110 nafar xodim uchun 92 ta o‘quv seminari o‘tkazildi. Shuningdek, 11 995 nafar xodim attestasiyadan o‘tkazilib, ularning 77,4 foizi malakali deb topildi. Bu sa’y-harakatlar davlat boshqaruvida kadrlar salohiyatini oshirishda muhim qadam bo‘ldi. 

Ta’sir choralari

Hisobot davomida jami 2 580 ta ta’sir chorasi qo‘llanilib, ular orasida 58 ta da’vo arizasi, 74 ta taqdimnoma, 147 ta xulosa va 2 266 ta ma’muriy chora kiritildi. Natijada sudlar tomonidan tadbirkorlar foydasiga 16,6 milliard so‘mlik da’volar qanoatlantirilib, 118 ta noqonuniy qaror bekor qilindi, 100 dan ortiq mas’ul shaxs esa intizomiy javobgarlikka tortildi.

Qonunchilik ijrosi yuzasidan natijalar

Qonunchilik ijrosini ta’minlash borasida 7 ta taqdimnoma kiritilib, 551 nafar mansabdor shaxsga ma’muriy bayonnomalar rasmiylashtirildi va 37 nafar xodim intizomiy javobgarlikka tortildi. Ushbu natijalar davlat boshqaruvi tizimini yanada takomillashtirish va qonunchilikka rioya etishni kuchaytirishga xizmat qiladi. Shu tariqa, 2024-yilda olib borilgan ishlar davlat organlarida shaffoflik va qonun ustuvorligini ta’minlash yo‘lida muhim qadam bo‘ldi.