Qirg‘izistonda o‘zbeklar va qirg‘izlarni urishtirishmoqchimi? Japarov ogohlantirdi

Uning fikricha, bundan maqsad mamlakatda tartibsizliklar uyushtirish va bo‘lajak prezidentlik sayloviga xalaqit berishdir.

O‘zbeklar va qirg‘izlar o‘rtasida nizo chiqarish rejasi bormi?

Japarovning aytishicha, ayrim kuchlar odamlarning milliy tuyg‘ularidan foydalanib, ikki millatni bir-biriga qarshi qo‘yishga urinishi mumkin.

Buning uchun yolg‘on xabarlar, turli mish-mishlar va odamlarni g‘azablantiradigan bayonotlardan foydalanish rejalashtirilayotgani ta’kidlangan.

Prezident hozircha bunday rejalar muhokama bosqichida ekanini, biroq ularni amalga oshirish xavfi borligini aytgan. U ehtimoliy provokatsiyalardan ko‘zlangan maqsad aholi orasida norozilikni kuchaytirish, ommaviy tartibsizliklar keltirib chiqarish va saylov jarayonini izdan chiqarish bo‘lishi mumkinligini bildirdi.

Hozircha mazkur rejalarni kimlar tayyorlayotgani yoki ularga aloqador shaxslar aniqlangani haqida ochiq ma’lumot berilmagan.

Xitoy — Qirg‘iziston — O‘zbekiston temiryo‘li bunga qanday aloqador?

Japarov bu urinishlarni Xitoy — Qirg‘iziston — O‘zbekiston temiryo‘li qurilishi bilan ham bog‘lagan. Uning fikricha, ayrim siyosiy kuchlar ushbu yirik transport loyihasining muvaffaqiyatli yakunlanishini istamaydi. Shu sabab avval Xitoyga qarshi kayfiyatni kuchaytirish orqali odamlarni norozilikka undashga harakat qilingan.

Prezidentning ta’kidlashicha, bu urinishlar kutilgan natijani bermagach, endi o‘zbek va qirg‘iz aholisi o‘rtasida kelishmovchilik chiqarish yo‘li ko‘rib chiqilayotgan bo‘lishi mumkin.

Xitoy — Qirg‘iziston — O‘zbekiston temiryo‘li mamlakat uchun muhim loyihalardan biri hisoblanadi. U Qirg‘izistonning boshqa davlatlar bilan savdo va transport aloqalarini kengaytirishga xizmat qilishi kutilmoqda.

Biroq millatlararo mojaro uyushtirish rejasi aynan temiryo‘l qurilishiga qarshi qaratilgani hozircha mustaqil dalillar bilan tasdiqlanmagan.

Japarov 1990 va 2010-yillardagi voqealarni eslatdi

Qirg‘iziston prezidenti o‘z bayonotida mamlakat janubida 1990 va 2010-yillarda yuz bergan millatlararo to‘qnashuvlarni ham yodga olgan. O‘sha voqealarda o‘zbeklar va qirg‘izlar orasida ko‘plab tinch aholi vakillari jabrlangan. Japarov katta avlod vakillarini yoshlarga bu voqealarning oqibatlarini tushuntirishga chaqirdi.

“O‘zbek bo‘lasizmi yoki qirg‘iz, hech qanday provokatsion gaplarga uchmang va o‘zingizni mojaroga tortishlariga yo‘l qo‘ymang”, — dedi u.

Prezidentning so‘zlariga ko‘ra, mamlakat huquqni muhofaza qiluvchi organlari ehtimoliy tartibsizliklarni bir-ikki kun ichida bostirish imkoniyatiga ega. Biroq kuch ishlatilishi odamlarning jabrlanishiga olib kelishi mumkin.

Shu sabab u aholini millatlararo adovat qo‘zg‘atuvchi chaqiriqlarga ergashmaslikka, shubhali harakatlar haqida esa Davlat milliy xavfsizlik qo‘mitasi, Ichki ishlar vazirligi yoki mahalliy hokimiyat organlariga darhol xabar berishga chaqirdi.

Japarov millatlararo adovat qo‘zg‘atgan shaxslar qonun oldida javob berishini ham ta’kidladi.

Bayonot Qirg‘izistonda prezidentlik sayloviga tayyorgarlik boshlangan paytga to‘g‘ri keldi. 10-noyabr kuni Sadir Japarov Markaziy saylov komissiyasiga prezidentlikka o‘z nomzodini mustaqil ilgari surish uchun ariza topshirgan.

Mamlakatda prezidentlik saylovi 2027-yil 27-yanvarga belgilangan.