Rossiya kompaniyasi o‘zbekistonlik ishchilardan 2,9 milliard so‘m qarzdor

“O‘zkimyosanoat” AJning ma’lum qilishicha, Qashqadaryo viloyatidagi “Dehqonobod kaliy” zavodi qurilishining bosh pudratchisi Rossiyaning “ЗУМК-Инжиниринг” MCHJ kompaniyasi O‘zbekiston tomoni tomonidan moliyaviy majburiyatlar o‘z vaqtida bajarilganiga qaramay, o‘zbekistonlik ishchilar oldida ish haqi bo‘yicha katta qarzdorlik to‘plagan.

Kompaniya bankrotga uchragan

“ЗУМК-Инжиниринг” MCHJ bilan tuzilgan shartnomada kon-boyitish majmuasi qurilishini yakunlash va uni 2014-yil dekabr oyida ishga tushirish ko‘zda tutilgan edi. Biroq moliyaviy qiyinchiliklar tufayli pudratchi ishni yakunlab, 279 nafar xodimga ish haqini to‘lay olmadi. 2018-yilda kompaniya Rossiya Federatsiyasi Arbitraj sudi tomonidan bankrot deb topilgan, bu esa qarzlarni undirish jarayonini qiyinlashtirgan.

To‘lanmagan ish haqi miqdori 2,9 mlrd. so‘mni tashkil etadi

To‘lanmagan ish haqi miqdori 2,9 mlrd. so‘mni tashkil etadi. Jarayonni tezlashtirish uchun 2023-yilda White & Case xalqaro yuridik firmasi ishga qo‘shildi va 205 nafar ishchi o‘rtasida taqsimlangan 650 million so‘m to‘lanishiga erishdi.

Xodimlar qayta murojaat bilan chiqmoqda

2025-yil 10-yanvarda sobiq xodimlar qolgan to‘lovlarni olishda yordam so‘rab yana zavod rahbariyatiga murojaat qilishdi. Bunga javoban “Dehqonobod kaliy” boshqaruvi raisi uchrashuv o‘tkazib, sud jarayonlari bilan bog‘liq mavjud holatni tushuntirdi va qarzlarni undirish jarayoni yakunlanayotganiga ishontirdi. Korxona rahbariyati jabrlangan ishchilarga yordam ko‘rsatishda davom etishga tayyorligini bildirdi.