2025-yil 8-yanvarning eng muhim voqealari dayjesti

O‘zbekiston, Tojikiston va Qirg‘iziston bosh vazirlari Farg‘onada uchrashdi

Farg‘ona viloyatining O‘zbekiston, Qirg‘iziston, Tojikiston davlat chegaralari tutashgan nuqtada uch mamlakat hukumatlari rahbarlari boshchiligidagi delegatsiyaning uchrashuvi bo‘lib o‘tdi. Tomonlar ushbu uchrashuv uch mamlakat Davlat rahbarlari – O‘zbekiston Respublikasi Prezidenti Shavkat Mirziyoyev, Qirg‘iz Respublikasi Prezidenti Sadir Japarov va Tojikiston Respublikasi Prezidenti Emomali Rahmon o‘rtasida hamkorlik va mintaqaviy integratsiyani mustahkamlash maqsadida davlat chegarasi masalalari bo‘yicha avval erishilgan kelishuvlar doirasida o‘tkazilayotganini ta’kidlandi.

Humoyun Sultonov Australian Open’da 30 ming 380 AQSh dollari ishlab oldi

Humoyun Sultonov faoliyatida ilk bor Australian Open turnirida ishtirok etdi. U musobaqaning saralash bosqich ilk davrasida reytingda o‘zidan deyarli 100 pog‘ona yuqorida borayotgan kolumbiyalik Daniel Elaxi Galanni mag‘lubiyatga uchratib, ikkinchi bosqichda jarohat sabab yutib turgan uchrashuvini boy berib qo‘ygandi. Shunga qaramay, Humoyun Avstraliya Ochiq chempionatidagi ishtirokidan qimmatli 8 reyting ochkosi hamda 30 ming 380 AQSH dollari miqdorida mukofot puli ishlab oldi. Sultonov Australian Open turniri yakunlari bo‘yicha yangilanadigan ATP reytingida Top-200’ga kirib olishi mumkin. 

Magistratura mutaxassisliklari boʻyicha Prezident stipendiyasi gʻoliblari tasdiqlandi

2024/2025-oʻquv yili uchun oliy taʼlim muassasalari magistratura bosqichining 20 nafar talabasi Oʻzbekiston Respublikasi Prezidenti stipendiyasi tanlovi gʻolibi boʻldi. Gʻoliblar nomi Oliy taʼlim, fan va innovatsiyalar vazirligi Hayʼat qarori bilan tasdiqlangan. Shuningdek, tanlovda ishtirok etib, sovrindor boʻlmagan talabalar ham tegishli OTM rahbari (rektor/direktor) tomonidan ragʻbatlantiriladi. Bunda ularning yetib kelgan bosqichi inobatga olinadi. Jumladan, Prezident davlat stipendiyasi tanlovida ishtirok etib, tanlovning suhbat bosqichiga tavsiya etilgan ammo sovrindor boʻla olmagan talabgorlarga bazaviy stipendiya miqdorining 5 baravari miqdoridagi bir martalik pul mablagʻi beriladi. Tanlovning suhbat bosqichiga tavsiya etilmagan talabgorlar esa bazaviy stipendiya miqdorining 3 baravari miqdoridagi bir martalik pul mablagʻi bilan mukofotlanadi.

 Xo‘jaobod tumanida yangi GES qurilmoqda

Andijonning Xo‘jaobod tumanida yangi GES qurilmoqda. Tuman hududidan oqib o‘tuvchi Katta Farg‘ona kanali bo‘yida “XJY POWER PTE ANDIJAN” MCHJ tomonidan qiymati $5 mln.ga teng gidroelektr stansiyasi qurilmoqda. Ushbu loyiha foydalanishga topshirilgach, yiliga 1,8 MVt elektr energiyasi ishlab chiqariladi.