2025-yil 20-yanvarning eng muhim voqealari dayjesti

Dehlida O‘zbekiston bog‘i va Alisher Navoiy haykali qurilishi mumkin

“Dunyo” axborot agentligi Hindiston poytaxti gubernatori Vinay Kumar Saksena O‘zbekiston elchisi Sardor Rustamboyev bilan uchrashuvda loyihalarni amalga oshirishda hamkorlik qilishga tayyorligini ma’lum qilgani haqida axborot berdi.

TIV vaziri Qirg‘izistonning O‘zbekistondagi yangi elchisidan ishonch yorliqlari qabul qildi

O‘zbekiston tashqi ishlar vaziri Qirg‘iz Respublikasining yangi tayinlangan Elchisi Duyshonkul Chotonov janoblaridan ishonch yorliqlari nusxalarini qabul qildi. "Shubhasiz, mamlakatlarimiz o‘rtasidagi qardoshlik rishtalari har sohada jadal rivojlanib bormoqda. Biz misli ko‘rilmagan yutuqlarga guvoh bo‘lmoqdamiz va ikki tomonlama munosabatlarining to‘liq salohiyatiga erishish uchun yanada katta marralarga erishishni reja qilmoqdamiz", - yozadi vazir.

O‘zbekiston Devis Kubogiga mezbonlik qiladi

O‘zbekiston terma jamoasi Devis Kubogi doirasida Bosniya va Gersegovinani qabul qiladi. O‘zbekiston tennis federatsiyasi 31-yanvardan 1-fevralga qadar ROZTM kortlarida Devis Kubogining navbatdagi bosqichi bo‘lib o‘tishini ma’lum qildi. 

O‘zbek allomalariga bag‘ishlangan turkum maqolalar chop etildi

Dunyoning yetakchi axborot platformalaridan biri CNN o‘zbek allomalari haqida ma’lumot beruvchi maqolalarni e’lon qildi. Maqolada IX asrning atoqli o‘zbek olimi Al-Farg‘oniy islomning ilm-fan taraqqiy topgan Oltin davriga katta hissa qo‘shgani, u astronomiya, matematika va geografiya fanlarida yetuk mutaxassis bo‘lib, ham fan tarixida, ham islom sivilizatsiyasida ham o‘z o‘rnini mustahkamlagani ta’kidlangan. Nashr bu allomalarning ilmiy merosi hozirgi kunda ham o‘z ahamiyatini yo‘qotmagani, ularning asarlari jahon ilm-fani taraqqiyoti yo‘lida xizmat qilayotganini urg‘ulagan.