2025-yil 15-yanvarning eng muhim voqealari dayjesti

Qayta tiklanuvchi energiya ulushi 54 foizga yetkaziladi

O‘zbekiston Prezidenti Shavkat Mirziyoyevning “Abu-Dabi Barqaror rivojlanish haftaligi” sammitida nutq so‘zladi. Prezident nutqida kam uglerodli rivojlanish bo‘yicha uzoq muddatli strategiya va “yashil” moliyalashtirish milliy dasturini ishlab chiqilgani, investitsiya loyihalarida “yashil” komponentlarni kelgusi besh yilda 50 foizgacha ko‘paytirilishini ta’kidladi. Hozirda xorijiy hamkorlar bilan qiymati 26 milliard dollardan ziyod va umumiy quvvati 24 gigavatt bo‘lgan 50 dan ortiq yirik loyihalar amalga oshirilmoqda. 2030-yilga qadar mamlakatda qayta tiklanuvchi energiya ulushini 54 foizga yetkazish reja qilingan.

O‘zbekiston ot sporti bo‘yicha Osiyo chempionatiga mezbonlik qiladi

Quvaytda Osiyo ot sporti federatsiyasi (AEF)ning navbatdagi Bosh Assambleyasi bo‘lib o‘tdi. Bosh Assambleya doirasida joriy yil nufuzli musobaqalardan birining mezbonligi poytaxtimizga topshirildi. Aniqrog‘i, 1-3-aprel kunlari Toshkent konkur bo‘yicha yoshlar o‘rtasidagi Osiyo chempionatini qabul qiladi. Rejaga ko‘ra, musobaqa "Universal Horses Stable" majmuasida tashkil etiladi. 

Aeroportlardagi yo‘lovchilar soni bir yilda 30% ga oshdi 

Uzbekistan Airports ma’lumotiga ko‘ra, 2024-yilda mamlakat aeroportlari jami 13,5 mln. yo‘lovchiga xizmat ko‘rsatgan. Bu oldingi yilga nisbatan 30% ko‘p. Shuningdek, o‘tgan yili respublika aeroportlari 113 622 ta reysga – 80 213 ta xalqaro, 33 409 ta mahalliy xizmat ko‘rsatgan. Bu 2023-yilga nisbatan 33% ko‘p.

Eng qadimiy sanalgan metall qurollar topildi

O‘zbekiston Fanlar Akademiyasi Arxeologiya instituti va Rossiya davlat Ermitajining Buxoro ekspeditsiyasi arxeologlari tomonidan mana, 43-yildirki, Poykent xarobalarida tadqiqotlar olib borilmoqda. Bu yerda faoliyat ko‘rsatayotgan muzeyda shu izlanishlar natijasi bo‘lgan 2200 dan ziyod eksponat bor. Yaqinda shu manzildan metalldan yasalgan qadimiy qurollar va boshqa jihozlar topildi. Topilmalar orasida olovni tashishga mo‘ljallangan, deya faraz qilinayotgan kapgir, hali nimaligi aniqlanmagan doirasimon jihoz va qo‘ng‘iroq ham bor.