2024-yil 28-iyunning eng muhim voqealari dayjesti
Nogironligi bo‘lganlarga imtiyozlar, frilanser yoshlar 50 mingdan oshdi, kreativ iqtisodiyot butunjahon anjumani, yoshlar kooperatsiyasi — kunning eng muhim xabarlari.
2 daqiqa o‘qiladi
2 tadan tumanda Yoshlar kooperatsiyasi tashkil qilinadi
Prezident Shavkat Mirziyoyev raisligida yoshlar siyosatiga bag‘ishlangan videoselektor yig‘ilishi hamda yoshlar bilan muloqot davom etmoqda.
Magistral yo‘llar bo‘yida 50 mingta ko‘chma savdo nuqtalari tashkil qilinib, yoshlarga ijaraga beriladi. Bunda, dastlabki 6 oyda yoshlarga ijara haqi va soliqdan imtiyoz beriladi.
Bu yil 60 ming gektar yer yoshlarga ajratildi. Endilikda har bir viloyatda 2 tadan tumanda Yoshlar kooperatsiyasi tashkil qilinadi, ularga kerakli texnika, uskunalar va urug‘lik yetkazib beriladi.
Kreativ iqtisodiyot bo‘yicha To‘rtinchi butunjahon anjumani
“Kreativ sanoat parklari”ni rivojlantirish uchun bu yilni o‘zida 10 million dollar yo‘naltiriladi.
Shuningdek, 2-4 oktyabr kunlari Toshkent shahrida Kreativ iqtisodiyot bo‘yicha To‘rtinchi butunjahon anjumani o‘tkaziladi.
Tadbir kuniga qadar kreativ industriyani rivojlantirish bo‘yicha qonun qabul qilinishi ko‘zda tutilgan.
Frilanserlar 50 mingdan oshdi
Bugungi kunda IT sohasida o‘zini o‘zi band qilgan yoshlar – frilanserlar 50 mingdan oshdi.
Bunday yoshlarimiz yiliga ellik, yuz, hatto ikki yuz ming dollargacha eksport qilmoqda.
Lekin, bizda ularni boshini qovushtiradigan, muammolarini eshitib, huquqlarini himoya qiladigan tizim yo‘qligi ko‘rsatib o‘tildi.
Nogironligi bo‘lganlarga imtiyozlar
Nogironligi bo‘lgan yoshlarga chet tilidan imtihon topshirish yengillashadi.
Jumladan, chet tili bo‘yicha milliy sertifikat (CEFR) olishda qo‘lda yozish imkoniyati bo‘lmaganlarga kompyuterda imtihon topshirish sharoiti yaratiladi.
