2024-yil 25-dekabrning eng muhim voqealari dayjesti

MDH davlatlari rahbarlarining norasmiy uchrashuvida ishtirok etgan Shavkat Mirziyoyev, Afg‘onistonga insonparvarlik yordami yuborgan O‘zbekiston, O‘zbekistonliklarning Turkiyaga turistik safarlari oshishi, yilning eng yaxshi ayol dzyudochisi sovriniga da’vogarlik qilayotgan Diyora Keldiyorova

Shavkat Mirziyoyev MDH davlatlari rahbarlarining norasmiy uchrashuvida ishtirok etdi 

O‘zbekiston Respublikasi Prezidenti Shavkat Mirziyoyev 25-dekabr kuni Sankt-Peterburg shahrida MDH davlatlari rahbarlarining norasmiy uchrashuvida ishtirok etdi. Tadbirda Rossiya Prezidenti Vladimir Putin, Belarus Prezidenti Aleksandr Lukashenko, Qozog‘iston Prezidenti Qasim-Jomart Toqayev, Qirg‘iziston Prezidenti Sadir Japarov, Tojikiston Prezidenti Emomali Rahmon va Turkmaniston Prezidenti Serdar Berdimuhamedov ham qatnashdi. Uchrashuvda 2024-yildagi birgalikdagi ishlarning asosiy yakunlari sarhisob qilindi va ko‘p tomonlama hamkorlikning kelgusi yilga mo‘ljallangan ustuvor vazifalari ko‘rib chiqilgan. 

O‘zbekiston Afg‘onistonga insonparvarlik yordami yubordi

Yordam yuki zarur oziq-ovqat hamda dori-darmon vositalaridan iborat. Bundan tashqari, “Salomatlik” yordami doirasida 25-30 dekabr kunlari o‘zbekistonlik shifokorlar Afg‘onistonning Balx viloyatida aholi vakillarini tibbik ko‘rikdan o‘tkazadi. Bu tadbir Afg‘oniston tomonining so‘roviga asosan tashkil etilgan. 

O‘zbekistonliklarning Turkiyaga turistik safarlari oshdi

2024-yilning yanvar-noyabr oylari mobaynida 214,2 ming nafar O‘zbekiston Respublikasi fuqarolari Turkiyaga turistik maqsadlarda safar qilgan. Bu ko‘rsatkich o‘tgan yilning shu davri bilan solishtirilganda 38,9 ming nafarga yoki 22,2 foizga o‘sganini ko‘rsatadi. Safarlarning ko‘pchiligi sayyohlik maqsadlariga mo‘ljallangan bo‘lib, umumiy raqamlarda alohida o‘rin tutadi. Turkiyaga ketgan o‘zbekistonliklarning asosiy safar maqsadlari quyidagicha taqsimlandi: sayyohlik maqsadida 163 ming 242 nafar kishi tashrif buyurgan bo‘lsa, qarindoshlarni yo‘qlash maqsadida 42 ming 917 nafar kishi safar qilgan. Shuningdek, 3 ming 811 nafar fuqaro davolanish, 2 ming 618 nafar o‘qish va 1570 nafar xizmat vazifasi yuzasidan Turkiyaga yo‘l olgan. 

Keldiyorova yilning eng yaxshi ayol dzyudochisi sovriniga da’vogarlik qilmoqda 

Xalqaro dzyudo federatsiyasi (IJF) “Female Judoka of the Year” nominatsiyasi bo‘yicha nomzodlarni e’lon qildi va o‘zbekistonlik Diyora Keldiyorova yilning eng yaxshi ayol dzyudochisi bo‘lishga da’vogarlik qilmoqda. Bu haqda IJF rasmiy sayti xabar berdi. Diyora Keldiyorovadan tashqari Alise Bellandi (Italiya), Krista Deguchi (Kanada), Andreya Leski (Sloveniya), Barbara Matich (Xorvatiya), Beatriz Souza (Braziliya) va Natsumi Sunoda (Yaponiya) kabi dzyudochilar nomzodlar qatorida qayd etilgan.