Varshavadagi pichoqbozlikda o‘zbekistonlik yigit jabrlanuvchi bo‘lgan
O‘zbekiston fuqarosi tergov eshituvidan keyin qo‘yib yuborilishi ta’kidlandi.
1 daqiqa o‘qiladi
Polshaning Varshava shahrida 26 yoshli o‘zbekistonlik yigit 15 yoshli ukrainalik ikki o‘smirga pichoq bilan hujum qilgani haqida xabar berilgan edi. Unda voqea 22-iyul kuni Brodno bog‘ida sodir bo‘lgani va jarohatlangan o‘smirlar kasalxonaga yotqizilgani aytilgandi. Mazkur holat yuzasidan O‘zbekistonning Polshadagi elchixonasi bilan bog‘lanib vaziyatga oydinlik kiritildi.
Ukrainaliklar O‘zbekiston fuqarosiga hujum qilgan
Aytilishicha, bog‘da 4 nafar ukrainalik o‘zbekistonlik fuqaroni talon-toroj qilish maqsadida unga hujum qilgan. O‘zbekistonlik yigit hujumdan tan jarohati olgan. U o‘zini himoya qilish maqsadida pichoqdan foydalangan. "Ayni vaqtda tergov harakatlari olib borilmoqda. Unda O‘zbekiston fuqarosi aybdor emas, aksincha, jabrlanuvchi sifatida ishtirok etmoqda", — deydi diplomatik vakolatxona.
Tergov eshituvidan keyin qo‘yib yuboriladi
Yigitga konsullik huquqiy yordami ko‘rsatilgan va tarjimon bilan ta’minlangan. Qo‘shimcha qilinishicha, bugun 24-iyul kuni O‘zbekiston fuqarosi tergov eshituvidan keyin qo‘yib yuboriladi.
