Ortiqxo‘jayev Toshkentda 6 ta mehmonxona va qo‘shma klinika ochmoqchi

Tadbirkor va Toshkentning sobiq hokimi Jahongir Ortiqxo‘jayev 20-dekabr kuni O‘zbekiston Prezidenti bilan uchrashuvda o‘zining kelajakdagi loyihalari haqida so‘zlab berdi.

Tadbirkorlarda hali ham qo‘rquv bor

O‘z nutqini boshlashda u ayrim tadbirkorlar hali ham o‘z faoliyatlarining haqiqiy ko‘rsatkichlarini oshkor qilishdan cho‘chiyotganini ta’kidladi.

“Hurmatli Prezident, hozir ko‘plab tadbirkorlar 500 million dollarlik aylanma raqamlarini aytishdi, siz xursand bo‘ldingiz. Ularda hali ham qo‘rquv bor, aslida ularning barchasida 1 milliard dollarlik aylanma mavjud”, – dedi Ortiqxo‘jayev tinglovchilarning kulgi sadolari ostida.

Uning fikricha, mamlakatda yaratilgan sharoitlar tufayli ba’zi kompaniyalar 5-10 barobar o‘sgan.

Tadbirkor Toshkentda 2, 3, 4 yulduzli mehmonxonalar qurmoqchi

Ortiqxo‘jayev “yagona ekotizim doirasida” Toshkentda 1200 o‘rinli oltita yangi mehmonxona ochilishini e’lon qildi. Gap Wyndham, Hyatt Place, Fairfield by Marriott, InterContinental, ibis brendlari ostidagi mehmonxonalar haqida bormoqda.

“Bular 2, 3, 4 yulduzli mehmonxonalar. Biz ishga tushirish jarayonini boshlab yubordik. Kelgusi yil oxirigacha ularni yakunlaymiz”, – deb aytdi u.

Joriy yilning mart oyidagi suhbatda Ortiqxo‘jayev Mirobod tumanidagi Alfraganus savdo hududida ochiladigan oltita mehmonxona, jumladan Holiday Inn Express, Wyndham Garden va Hilton Garden Inn haqida ma’lumot bergan edi.

AQShning eng yirik klinikasi bilan hamkorlikda yangi tibbiyot markazi rejasi

Ushbu uchrashuvda tadbirkor xorijiy hamkor bilan birgalikda klinika ochish rejalarini ham Prezidentga ma’lum qildi. Bu maqsadda AQShdagi eng yirik tibbiyot markazlari – Meyo klinikasi, Klivlend klinikasi va Sedars-Sinay tibbiyot majmuasi bilan muzokaralar o‘tkazildi.

“Uchala klinika ham hamkorlikka rozi bo‘ldi. Biz kamida bitta klinikadan rozilik olishni umid qilgandik, ammo bu yerda uchalasi ham O‘zbekistonda klinika qurish uchun hamkorlik qilishga rozi bo‘lishdi. Tajriba va mutaxassislar almashinuvi ko‘zda tutilgan. Shuningdek, ular universitetlardagi o‘qituvchilarni tayyorlash uchun professorlarni yuborishga ham rozilik bildirdi. Yaqin kelajakda loyihani boshlashni rejalashtirmoqdamiz”, – dedi Toshkentning sobiq hokimi.

Davlat rahbari loyihani ma’qulladi

Tadbirkorning ma’lum qilishicha, klinikani loyihalash bilan Xitoyning yirik kompaniyasi shug‘ullanmoqda, chet ellik hamkor sifatida esa Klivlend klinikasi ishtirok etadi.

O‘zbekiston Prezidenti Shavkat Mirziyoyev ushbu klinika “bizga juda zarur” ekanligini ta’kidladi.

“Ko‘plab fuqarolarimiz chet ellarga - Koreya, Isroil, Rossiyaga borib, u yerlarda pul sarflashmoqda. Agar Amerikaning yetakchi klinikalaridan biri bu yerga kelib, mahalliy mutaxassislarni o‘qitishni ham yo‘lga qo‘ysa, men bu loyihani qo‘llab-quvvatlashga tayyorman”, – dedi davlat rahbari.