Taniqli rassomlarning rasmlari OLX’da sotilyapti(mi?)

Avvalroq ijtimoiy tarmoqda Davlat san’at muzeyi kolleksiyasidagi suratlar OLX portalida sotilayotgani haqida ma’lumot tarqalgan edi.

Sotilayotgan suratlar muzey kolleksiyasiga tegishli emas

Mazkur holat yuzasidan Madaniy meros agentligi muzey kuratorlari bilan birgalikda yuqorida qayd etilgan san’at asarlarini sinchkovlik bilan ko‘zdan kechirdi. Bu haqdagi tegishli surishtiruv va tushuntirish hisobotlari muzey muhofizlari tomonidan atroflicha qiyosiy o‘rganildi. Ushbu suratlar muzey kolleksiyasiga mansub emasligi hamda ularning elektron sotuvga chiqarilishi bilan O‘zbekiston davlat san’at muzeyining rekonstruksiya va joriy ta’mirlash uchun yopilishi o‘rtasida hech qanday bog‘liqlik mavjud emasligini aytildi.

Muzey eksponatlari raqamlashtirilgan holatda saqlanadi

Shuning bilan birga, O‘zbekiston davlat san’at muzeyining barcha eksponatlari to‘liq raqamlashtirilganini, davlat muzeylaridagi elektron identifikatsiya qilinuvchi muzey ashyolari va sara to‘plamlari soni barqaror o‘sishda davom etayotganini ma’lum qilindi. Hozirda davlat muzeylari fondlaridagi muzey ashyolari to‘plamlari soni 2 525 023 tani tashkil qilmoqda. Shundan, 1 815 211 tasi asosiy fondda, 709 812 tasi ilmiy-yordamchi fondda saqlanmoqda. 82 067 tasi esa muzey ekspozitsiyalarida namoyish etilmoqda.