“Qora dayjest”: 2025-yil 8-yanvar voqealari

Toshkent hayvonot bog‘ida jirafa vafot etdi

Toshkent hayvonot bog‘ida proventrikulus atoniyasi bilan og‘rigan jirafa halok bo‘ldi. Bu haqda muassasa matbuot xizmati xabar berdi.

Hayvonot bog‘i xodimlari hayvonni saqlab qolish uchun barcha mumkin bo‘lgan davolash usullaridan foydalanilganini, jumladan, xalqaro veterinariya mutaxassislari bilan maslahatlashuvlar va videokonferensiyalarda ishtirok etganini ta’kidladi.

Ammo o‘limdan keyingi ekspertiza o‘lim sababi oshqozon shishi ekanligini ko‘rsatdi.

Toshkent viloyatida noma’lum to‘rt shaxs ekologiya inspektorlariga hujum qildi

4-yanvar kuni Toshkent viloyati Yangiyo‘l tumani “Samarqand” mahallasida 4 nafar noma’lum shaxs “Jiguli” rusumli avtomashinada ekologiya inspektorlarining yo‘lini to‘sib, ularni kaltaklagan. Bu haqda Ekologiya vazirligining matbuot xizmati xabar beradi.

Hujum reyd paytida sodir bo‘lgan. Tuman ekologiya bo‘limi boshlig‘i va bosh mutaxassis qoidabuzarlarning hujjatlarini tekshirib ko‘rmoqchi bo‘lgan, biroq ular rad javobini berib, inspektorlarga hujum qilib, o‘rtacha og‘irlikdagi jarohatlarni yetkazgan. Jabrlanganlarga tibbiy yordam ko‘rsatilgan bo‘lib, ularning ahvoli barqaror deb baholanmoqda.

Huquq-tartibot idoralari hujum yuzasidan surishtiruv ishlarini boshlagan.

Angren shahar hokimining yordamchilari jazolandi

Angren shahar hokimining 2 ta yordamchisi Kimyogar MFY bo‘yicha D.Nosirovga hayfsan va Chinniobod MFY bo‘yicha T.Xudayqulovga o‘rtacha oylik maoshining 30 foizi miqdorida jarima jazosi belgilandi.

Bunga ularning xizmat vazifalariga sovuqqonlik bilan qarab, mahallada tadbirkorlikni rivojlantirish ishlarini o‘z holiga tashlab qo‘ygani va ish bilan ta’minlash masalasida kelib tushgan aholi murojaatlariga loqaydlik bilan qarab, ijro intizomini qo‘pol tarzda buzganligi sabab bo’lgan.

Shuningdek, Angren shahar hokimligi yetakchi mutaxassisi Abdukadirov Rustam Izzatullo o‘g‘liga ham hayfsan jazosi qo‘llanildi.

Valyutani noqonuniy ayirboshlagan fuqaro qo‘lga olindi

Departamentning Sirdaryo viloyati boshqarmasi tomonidan Guliston shahri, “Yuksalish” MFY hududida o‘tkazilgan tezkor tadbirda valyuta ayirboshlash bilan shug‘ullanib kelgan N.P. fuqaro M.X.ga 3 000 AQSH dollarini 38,8 mln so‘mga sotgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakalari o‘tkazilmoqda.

Qamchiq dovonida ikki kishi halok bo‘ldi

8-yanvar kuni tushdan so‘ng Qamchiq dovonidagi zaxira yo‘lning taqiqlangan qismiga qorda uchish uchun sayohat qilgan guruh bilan fojia yuz berdi. Guruhda jami 8 kishi bo‘lgan, ulardan biri – 31 yoshli fuqaro yo‘lning chetroq qismida selfi qilayotgan vaqtda yiqilib tushgan. Yordam bermoqchi bo‘lgan yana bir sherigi uning oldiga tushgach, ularning ustidan bir necha metrlik qor uyumi bosib qolgan. Natijada fuqarolar vafot etgan.

Bosh prokuraturaning xabar berishicha, Qamchiq dovonida ikki kishi halok bo‘lganligi holati yuzasidan tergovga qadar tekshirish harakatlari olib borilmoqda.

Farg‘onada uyda saqlanayotgan Kaliforniya forsi iloni hayvonot bog‘iga o‘tkazildi

Ijtimoiy tarmoqlarning birida Farg‘onada uyda saqlanayotgan yovvoyi Kaliforniya forsi iloni aks etgan video tarqaldi. Farg‘ona viloyati IIB TKX Kiberxavfsizlik bo‘limi xodimlari bu holatni viloyat Ekologiya boshqarmasiga bilan birga o‘rgandi. Bu haqda boshqarma axborot xizmati xabar qildi.

Shaharning Mash’al mahallasida yashovchi fuqaro K.K. o‘z xonadonida ilonni hech qanday ruxsatnomasiz boqib kelayotgani aniqlangan. Bu holat “Hayvonot dunyosini muhofaza qilish va undan foydalanish to‘g‘risida”gi qonunga zid ekani uchun masala tegishli idoralarga yo‘naltirilgan.

Qayd etilishicha, Ekologik nazorat inspeksiyasi va Farg‘ona shahar bo‘limi davlat inspektorlari vaziyatni o‘rganib, fuqaro bilan suhbatlashgan. Natijada K.K. ilonni hayvonot bog‘iga topshirishga rozi bo‘lgan va ilon Farg‘ona hayvonot bog‘iga o‘tkazilgan.