Messi yana tarix sahifalarida: Fransiya va Norvegiya esa keyingi bosqichga chiqdi

Jahon chempionatining navbatdagi turi bir qator muhim natijalar va tarixiy rekordlar bilan yodda qoldi. Lionel Messi mundial tarixidagi eng yaxshi to‘purarga aylandi, Fransiya va Norvegiya esa muddatidan oldin pley-off masalasini hal qildi. J guruhida Jazoir muhim kambek qayd etib, imkoniyatlarini saqlab qoldi. Endi esa barcha e’tibor hal qiluvchi uchinchi turga qaratilgan. Xo‘sh, kimlar keyingi bosqichga chiqadi?

Messi yana tarix yozdi

J guruhidagi markaziy bahsda Argentina Avstriyani 2:0 hisobida mag‘lub etdi. Uchrashuv boshida Lionel Messi hisobni ochish uchun qulay imkoniyatga ega bo‘ldi, biroq 9-daqiqada belgilangan penaltidan foydalana olmadi. Shu tariqa argentinalik yulduz Jahon chempionatlari tarixida eng ko‘p penalti tepgan va eng ko‘p penaltidan adashgan futbolchiga aylandi.

Biroq Messi o‘z xatosini tezda to‘g‘riladi. Birinchi bo‘lim oxirida u hisobni ochdi va jamoasini oldinga olib chiqdi. Avstriya ikkinchi bo‘limda vaziyatni o‘zgartirishga harakat qildi, ammo Argentina himoyasi ishonchli harakat qildi. O‘yin yakunlanayotgan paytda Messi yana bir bor darvozani ishg‘ol qilib, dubl muallifiga aylandi.

Bu gollar Messi uchun mundiallardagi 17 va 18-gollar bo‘ldi. Natijada u 16 gol bilan rekordchi bo‘lib turgan germaniyalik Miroslav Klozeni ortda qoldirib, Jahon chempionatlari tarixidagi eng yaxshi to‘purarga aylandi. Argentina 6 ochko bilan guruh peshqadami bo‘lib turibdi va amalda pley-off yo‘llanmasini hal qildi. Avstriya esa 3 ochko bilan qolmoqda.

Yomg‘ir ham Fransiyani to‘xtata olmadi

I guruhidagi uchrashuvda Fransiya Iroqni 3:0 hisobida mag‘lub etdi. Filadelfiyadagi bahsda fransuzlar o‘yin boshidanoq ustunlikni qo‘lga oldi va 14-daqiqada Kilian Mbappe hisobni ochdi. Birinchi bo‘lim yakunlanishiga yaqin kuchli yomg‘ir yog‘a boshladi va hakam uchrashuvni vaqtincha to‘xtatishga majbur bo‘ldi.

Ikkinchi bo‘lim qariyb ikki soat kechikib boshlandi. Shunga qaramay, bu Fransiyaning hujumkor o‘yiniga ta’sir qilmadi. Mbappe yana bir gol urib dubl qayd etdi. Keyinchalik Usmon Dembele ham o‘z nomini tabloga yozdirib qo‘ydi. Har ikki golga Maykl Olise katta hissa qo‘shib, ikkita golli uzatma amalga oshirdi.

3:0 hisobidagi g‘alaba Fransiyaga muddatidan oldin pley-off yo‘llanmasini taqdim etdi. Ikki turdan keyin jamoa hisobida 6 ochko mavjud va ular guruhdagi eng barqaror jamoalardan biri bo‘lib turibdi.

Holand dubli Norvegiyani keyingi bosqichga olib chiqdi

I guruhining ikkinchi o‘yinida Norvegiya va Senegal muxlislarga haqiqiy gol shousini taqdim etdi. Bahsning birinchi bo‘limi oxirida Markus Pedersen hisobni ochib, norveglarni oldinga olib chiqdi. Ikkinchi taym boshida esa Erling Holand ustunlikni ikki baravar oshirdi.

Senegal taslim bo‘lish niyatida emasdi. Ismoil Sarrning goli afrikaliklarga umid bag‘ishladi. Ammo oradan ko‘p o‘tmay Holand yana sahnaga chiqib, o‘zining ikkinchi golini urdi va dubl qayd etdi. O‘yin so‘nggida Sarr ham dubl muallifiga aylangan bo‘lsa-da, bu Senegalni mag‘lubiyatdan qutqarib qola olmadi.

Yakunda Norvegiya 3:2 hisobida g‘alaba qozondi va ochkolari sonini 6 taga yetkazdi. Shu tariqa norvegiyaliklar ham Fransiya qatori pley-off bosqichiga chiqishni rasman ta’minladi. Endi ikki jamoa uchinchi turda guruh birinchiligi uchun o‘zaro maydonga tushadi.

Jazoir muhim kambek bilan kurashni davom ettirdi

J guruhidagi yana bir muhim bahsda Jazoir Iordaniya ustidan 2:1 hisobida g‘alaba qozondi. Uchrashuvning birinchi bo‘limida Iordaniya yaxshiroq harakat qildi va 36-daqiqada Nizar ar-Rashdan hisobni ochdi.

Ikkinchi bo‘limda esa o‘yin butunlay o‘zgardi. Jazoir tajribasi va mahoratini namoyish etdi. Riyod Mahrezning uzatmasidan keyin Nodir Benbuali hisobni tenglashtirdi. O‘yin tugashiga sakkiz daqiqa qolganida Amin Guiri g‘alaba golini urib, jamoasiga muhim uch ochkoni olib berdi.

Bu natijadan so‘ng Jazoir pley-off uchun kurashni davom ettirmoqda. Iordaniya esa so‘nggi turda Argentina bilan juda murakkab sinov kutmoqda.