Atrof-muhitni ifloslantiruvchi manbalar monitoringi qilish qanday amalga oshiriladi?

Vazirlar Mahkamasining 25.11.2024-yildagi 783-son qarori bilan sanoat korxonalarining atrof-muhitga salbiy ta’sirini kamaytirishni ta’minlash choralari belgilandi.

347 ta avtomatlashtirilgan kichik stansiya xarid qilinadi

Prezidentning 31.05.2023-yildagi PF-81-son Farmoniga muvofiq tuman (shahar)larda atmosfera havosining ifloslanishini fon monitoringi qilishning 347 ta avtomatlashtirilgan kichik stansiyasini xarid qilish va o‘rnatish rejalashtirilgan. Hujjat bilan avtomatlashtirilgan kichik stansiyalarning manzilli ro‘yxati tasdiqlandi.

2025-yilgacha amalga oshirilishi zarur chora-tadbirlar

Ifloslantiruvchi manbalarni sifatli monitoring qilish uchun tasdiqlangan jadvalga ko‘ra, xo‘jalik yurituvchi subyektlar (atrof-muhitga ta’sir ko‘rsatish I toifasi – 2025-yil 1-iyulgacha, II toifasi – 2025-yil oxirigacha) quyidagilarni ta’minlashlari kerak:

ustuvor turg‘un (tashkillashtirilgan) ifloslantirish manbalaridan atmosfera havosiga chiqariladigan tashlamalarni monitoring qilishning avtomatlashtirilgan kichik stansiyalarini o‘rnatish;

yuqori samarali chang va gazni tozalash qurilmalari hamda mahalliy suv tozalash inshootlarini yangilariga almashtirish va mavjudlarini modernizatsiya qilish;

xo‘jalik yurituvchi subyektlarning sanitariya-himoya zonalarini avtomatlashtirilgan stasionar kuzatuv postlari bilan jihozlash.

O‘rnatiladigan yangi chang-gazni tozalash uskunasining samaradorligi kamida 99,5%, mavjud modernizatsiya qilinadigan uskunalarniki – kamida 95%, yangi va modernizatsiya qilinadigan mahalliy suv tozalash inshootlariniki – kamida 80% bo‘lishi kerak.

Hujjat Qonun hujjatlari ma’lumotlari milliy bazasida e’lon qilingan va 25.11.2024-yildan kuchga kirdi.