Deputat bilan mushtlashuvdan so‘ng migrantlarga jinoiy ish ochildi

Samara sudi asli tojikistonlik ikki mahalliy aholi va O‘zbekiston fuqarosini Davlat dumasi deputati hamda uning haydovchisini o‘ldirishga urinishda ayblab hibsga oldi. Deputat ko‘chadagi mushtlashuv vaqtida uning boshi yorilgani va haydovchining qo‘li singanini iddao qilgan. Bu haqda Migrant.uz nashri xabar berdi.

Dastlab bezorilik moddasi bo‘yicha jinoiy ish qo‘zg‘atilgan edi

Dastlab ularga nisbatan bezorilik moddasi bo‘yicha jinoiy ish qo‘zg‘atilgan edi. Biroq keyinchalik Tergov qo‘mitasi rahbari Aleksandr Bastrikinning iltimosiga ko‘ra, mojaro ishtirokchilari uyushgan guruh tomonidan jamoat burchini bajarayotgan ikki yoki undan ortiq odamni o‘ldirishga urinishda ayblanmoqda.

Deputat boshining orqa qismiga shisha bilan urilganini aytgan

Voqea 18-iyul kuni sodir bo‘lgan. Deputat Mixail Matveyevning iddaosiga ko‘ra, u bir guruh migrantlar odamlarga tegajog‘lik qilayotganini ko‘rgan va ularni to‘xtatmoqchi bo‘lgan ekan. Uning haydovchisi Vasiliyning (familiyasi aytilmagan) yelkasiga tayoq, deputatning o‘zi esa boshining orqa qismiga shisha bilan urilgani aytilgan.

Ayblanuvchilardan biri “Rossiya vatanparvari” ekan

Himoyachilar gumonlanuvchilarni uy qamog‘ida saqlashni so‘ragan. 16 yoshli ayblanuvchining onasi, Rossiya fuqarosi, sudda o‘g‘lining “Rossiya vatanparvari” ekanligini aytib, advokat ishga “Rus ayig‘i” tilshunoslik tanlovida qatnashganlik diplomlarini kiritishni so‘ragan.

O‘zbekistonlik fuqaro ularni ajratishga harakat qilgan

Undan tashqari ushbu ishda Tojikistonda tug‘ilgan 19 yoshli Rossiya fuqarosi Nekruz Baxirov va O‘zbekiston fuqarosi 19 yoshli Murod Musurov ham ayblanmoqda. Aytishlaricha, Musurov Matveyevning boshiga urgan. Uning o‘zi aybini inkor etib, yig‘ilganlarni ajratishga uringanini aytadi. U uchrashuvda tarjimon orqali muloqot qilgan.

Baxirov xabarga ko‘ra, jabrlanuvchidan kechirim so‘rashga tayyorligini aytgan. Voyaga yetmagan ayblanuvchi o‘z aybini tan olmagan.