Bekobodning “Metallurg” futbol klubi Superliga-2025da ishtirok etmaydigan bo‘ldi

O‘zmetkombinat AJ PFL so‘roviga javob qaytardi hamda “Metallurg” klubining Superligada ishtirok etmasligini ma’lum qildi. 

Endi hammasi aniq 

PFL “Metallurg” PFK MCHJ ustav kapitalining 100 foiz ulushiga egalik qiluvchi O‘zmetkombinat AJga murojaat qilib, 24 dekabr sanasiga qadar klubning Superligadagi kelgusi taqdiriga oydinlik kiritishni so‘ragandi. Kecha — 20-dekabr kuni O‘zmetkombinat AJ PFL so‘roviga javob qaytardi hamda “Metallurg” klubining Superligada ishtirok etmasligini ma’lum qildi. Javob xatida tashkilotning klubga homiylik mablag‘i ajratishi to‘xtatilgani va buning sabablari batafsil tushuntirilgan. 

Endi nima bo‘ladi? 

“Metallurg” Superliga o‘tish o‘yinlari orqali ligadagi o‘rnini saqlab qolgan bo‘lsa-da, tarkibidagi deyarli barcha futbolchilar bilan xayrlashgani ma’lum qilingandi. “Metallurg” klubining Superligadagi o‘rnini egallash jarayoni qanday ketma-ketlikda bo‘lishi avvalroq ma’lum qilingandi. Mana shu yo‘nalish asosida klublarga qaror qabul qilish uchun ma’lum vaqt beriladi va ularning qarori ham Liga tomonidan rasman ma’lum qilinadi.  

Ehtimoliy nomzodlar 

“Mazkur mavzuning davomi PFL hamda Assotsiatsiya o‘rtasidagi uchrashuvdan so‘ng rasmiy saytimizda e’lon qilinadi”, - deyiladi PFL xabarida. Ma’lumot uchun, Bekobod klubi o‘rniga avvalo “Olimpik” va “Xorazm” klublarining Superligada ishtirok etish imkoniyati ko‘rib chiqilishi, bu amalga oshmasa, “Lokomotiv” Pro liga emas, Superligada ishtirok etishi mumkinligi xabar qilingandi.