2025-yildan madaniyat va san’at sohalarida ish haqi oshiriladi

Prezident Shavkat Mirziyoyev 22-noyabr kuni madaniyat va san’at sohasini rivojlantirish, xususan, teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlashga oid takliflar taqdimoti bilan tanishdi.

Bu haqda o‘tgan yil 22-dekabrda bo‘lgan Respublika Ma’naviyat va ma’rifat kengashi yig‘ilishida aytilgan edi. Mutasaddilar shu borada ishlab chiqilgan chora-tadbirlar to‘g‘risida axborot berdi.

32 ta turkum spektakllar yaratish taklifi

Unga ko‘ra, 2025–2030-yillarda teatrlarda “Milliy qahramon” va “Inson qadri uchun” mavzularida 32 ta turkum spektakllar yaratish taklif etilmoqda.

Sahna asarlarini yaratishda ijodiy hamkorlikni qo‘llab-quvvatlash, dramaturgiya va rejissyorlikni yanada rivojlantirish bo‘yicha takliflar bildirildi. Xususan, teatr dramaturglari uchun Mahmudxo‘ja Behbudiy, yosh rejissyorlar uchun Bahodir Yo‘ldoshev nomidagi mukofotlarni ta’sis etish, “Nigoh” ijodiy loyihasini yo‘lga qo‘yish, milliy akademik musiqa san’ati bo‘yicha kompozitorlar tanlovini o‘tkazish taklif etildi.

Madaniyat va san’atning ta’lim bilan uzviy hamkorligini mustahkamlash, talabalarning teatrlarda amaliy mashg‘ulotlarini kegaytirish, teatr sohasiga oid ilmiy-tadqiqot ishiga buyurtmalar berish masalalariga alohida to‘xtalib o‘tildi.

mahorat maktablari

Teatr aktyor va rejissyorlari, teatrshunos va san’atshunoslarning mahorat maktablari tashkil etiladi. Teatr tanqidchilari va dramaturglar klubi tashkil etilib, ularning faoliyati qo‘llab-quvvatlanadi. Har yili nodavlat teatrlarga ham davlat buyurtmasi beriladi.

O‘zbekiston teatr jamoalarining milliy reytingi 

Umumiy va oliy ta’lim muassasalarida havaskor teatr jamoalari tuzilib, ular o‘rtasida tanlovlar o‘tkaziladi. Yoshlarni teatrlarga doimiy tashriflarini nazarda tutuvchi “Teatr – ibratxonadir” dasturi amalga oshiriladi.

Kelgusi yildan O‘zbekiston teatr jamoalarining milliy reytingi tuziladi. Hududlardagi teatr binolari mukammal ta’mirlanib, zamonaviy texnologiyalar asosida modernizatsiya qilinadi. Muqimiy nomidagi O‘zbekiston davlat musiqali teatriga “akademik” maqomi beriladi.

Madaniyat xodimlarining ish haqi oshiriladi

Bundan tashqari, taqdimotda soha vakillarini rag‘batlantirish masalalariga ham alohida e’tibor qaratildi. 2025-yildan boshlab, madaniyat va san’at, axborot-kutubxona va muzeylar sohasida faoliyat olib borayotgan xodimlar ish haqi miqdorlari oshirilishi belgilandi.

Moddiy manfaatdorlik xodimning ish samaradorligi (KPI) ko‘rsatkichlariga bog‘lanadi. Unda aholiga madaniy xizmat ko‘rsatish, ayniqsa, olis hududlarga gastrollar uyushtirish, yangi asarlar yaratish, iqtidorli yosh ijodkorlarni izlab topish kabi mezonlar inobatga olinadi.

Simfonik orkestri xodimlari ham munosib moddiy ragʻbatlantiriladi

Shuningdek, 2025-yildan boshlab O‘zbekiston Milliy simfonik orkestri xodimlarining ish haqlari oshirilib, munosib moddiy rag‘batlantiriladi. Orkestr jamoasi tomonidan davlat buyurtmasi asosida har yili yangi musiqiy asarlar yaratiladi, mahoratli dirijyor, orkestr ijrochilarining mahorat maktablari faoliyati yo‘lga qo‘yiladi. Orkestr jamoasining yurtimiz hududlari va xorijiy gastrol safarlari tashkil etiladi, yirik korxona va tashkilotlar xodimlari uchun konsert namoyishlari tashkil etiladi.

Iqtidorli yoshlarni saralash uchun yaxlit tizim

Shu bilan bir qatorda, davlatimiz rahbari tomonidan madaniyat va san’at ta’limini yangi bosqichga ko‘tarish masalalari bo‘yicha ham alohida topshiriqlar berildi.

Iqtidorli yoshlarni saralash uchun yaxlit tizim

Shu bilan bir qatorda, davlatimiz rahbari tomonidan madaniyat va san’at ta’limini yangi bosqichga ko‘tarish masalalari bo‘yicha ham alohida topshiriqlar berildi. Xususan, iqtidorli yoshlarni barvaqt aniqlash, saralash va o‘qitish bo‘yicha yaxlit tizimini yaratish, shuningdek, umumiy o‘rta, maktabdan tashqari, kasbiy, oliy ta’lim tashkilotlari hamda madaniyat va san’at tizimidagi ta’lim muassasalarida o‘quv rejalari va dasturlarining o‘zaro muvofiqligini ta’minlash vazifasi qo‘yildi.