Bugungi kunda film yoki oddiy videoni tanlash 10 yil oldingiga qaraganda qiyinlashgan

Ma’lum bo‘lishicha, hozir film yoki oddiy videoni tanlash 10 yil oldingiga qaraganda qiyinlashgan — kontent juda ko‘payib ketgan. Aqlli algoritmlar esa ekranni keraksiz videolar bilan to‘ldirib tashlamoqda.

Tadqiqot natijalariga ko‘ra, striming xizmatlaridan foydalanadiganlar “Netflix” va “YouTube"da nimani tomosha qilishni izlashga yiliga 110 soat vaqt sarflaydi. Bu haqda “Fortune” nashri xabar berdi.

Qayd etilishicha, bu maqsadsiz ravishda kontent tanlash va ko‘rib chiqishga sarflangan deyarli 5 kunlik vaqtni tashkil etadi.

Qiziqarli kontent topish 10 yil avvalgiga qaraganda ancha qiyinroq

“UserTesting” buyurtmasiga binoan “Talker Research” tomonidan o‘tkazilgan tadqiqot 2 000 nafar amerikalik striming platformalari obunachilari orasida o‘tkazildi.

Natijalar shuni ko‘rsatdiki, har beshinchi ishtirokchining fikricha, hozirgi kunda ko‘rish uchun qiziqarli kontent topish 10 yil avvalgiga nisbatan qiyinroq bo‘lib qolgan. Ishtirokchilarning ta’kidlashicha, buning asosiy sababi platformalarda haddan tashqari ko‘p kontent mavjudligidir.

So‘rovda qatnashganlarning 41%i katta hajmdagi kontent kutubxonalari to‘siq bo‘lib qolayotganini, 26%i esa platformalarda haddan tashqari ko‘p original ko‘rsatuvlar yaratilayotgani faqatgina tanlash jarayonini murakkablashtirmoqda, deb ta’kidlashgan.

Striming xizmatlarini tavsiya qiluvchi maslahatlar haqida so‘z yuritganda, so‘rovda qatnashganlarning 75%i qayta ko‘rish bo‘yicha aniq tavsiyalarni ma’qul ko‘rishlarini aytishgan.

Biroq 51%i taklif etilayotgan variantlar soni haddan ziyod ko‘payib ketayotganini tan olishgan. Ular o‘zlariga tavsiya etilgan barcha narsalarni ko‘rib chiqishga ehtiyoj sezmoqdalar.

Striming nima uchun afzal?

“Tavsiyalar algoritmlarining rivojlanishiga qaramay, tomoshabinlar kontentdan haqiqiy zavqlanish o‘rniga nimani ko‘rib chiqishga qaror qilish uchun yiliga deyarli besh kun vaqtini sarflaydilar,” — deydi “UserTesting” katta direktori Bobbi Meykzner tadqiqotga izoh berib.

Foydalanuvchilarning sezilarli qismi (48%) an’anaviy kabel televideniyesidan voz kechib, striming xizmatlarini tanlagan, chunki bu platformalar kontentning xilma-xilligi, tomosha qilish qulayligi va yo‘l-yo‘lakay ko‘rish imkoniyatini taqdim etadi.

Ammo, foydalanuvchilarning 51%i fikriga ko‘ra, hatto bu reklamalar mavjudligini anglatsa ham, ko‘proq striming platformalari variantlariga ega bo‘lishni istashadi.

Respondentlardan ularning “ideal” striming platformasi haqida so‘ralganda, eng ommabop istaklar orasida qo‘shimcha to‘lovlarsiz premium kanallarning mavjudligi (40%) va navigatsiyaning oddiy bo‘lishi (39%) bor edi.