O‘zbekistonda 7 yilda 2 mingdan ortiq xususiy bolalar bog‘chalari ochildi

Bugun Toskent shahridagi “Yangi O‘zbekiston” universitetida maktabgacha va maktab ta’limi vaziri Hilola Umarova ishtirokida nodavlat ta’lim mavzusiga bag‘ishlangan davra suhbati bo‘lib o‘tdi. Tadbirda so‘nggi yillarda O‘zbekistonda ochilayotgan xususiy ta’lim muassasalari faoliyatiga to‘xtab o‘tildi.

7 yilda 2 591 ta xususiy MTM

Boshqarma maʼlumotlariga koʻra, 2017-yildan buyon xususiy bogʻchalar soni 13 barobardan ziyod koʻpayib, 2 591 taga yetdi. Ulardagi tarbiyalanuvchilar soni esa 166 ming nafardan oshdi.

Qamrab olish 74 foizga oshdi

Maktabgacha ta’lim bilan qamrab olish 27 foizdan 74 foizga oshdi. 2030-yilga kelib uni xususiy sektor hisobidan 100 foizga oshirish rejalashtirilgan.

Xususiy maktablar

Shuningdek, so‘nggi yetti yilda mamlakatimizda xususiy maktablar soni 16,2 barobar o‘sib, 458 taga yetdi. Ayni paytda u yerda 82,8 mingdan ortiq bola ta’lim olmoqda.

Xususiy maktablarni ochish imkoniyatlari

Xususiy maktablar tashkil etish uchun bir qator litsenziyalash talablari soddalashtirilishi va “Oʻzbekiston – 2030” strategiyasi boʻyicha ularga turli imtiyozlar berilishi belgilab qoʻyilgan.

Jumladan, 2025-yil 1-yanvardan xususiy maktablar tashkil etishga 20 milliard soʻmgacha imtiyozli kreditlar beriladi. Yangi xususiy maktab tashkil etgan tadbirkorga maktab kommunal xarajatlarining 5 yil muddatga 50 foizini qoplab berish tizimi joriy etiladi. Shuningdek, tadbirkorlarning xususiy maktab qurishga yoʻnaltiradigan mablagʻlariga foyda soligʻini hisoblashda chegirma beriladi.

O‘quv markazlari

Nodavlat o‘quv markazlari sohasi yanada faol rivojlandi. Ayni paytda respublika bo‘yicha 1755 ta yoki yetti yil avvalgiga nisbatan 48 baravar ko‘p bunday muassasalar faoliyat ko‘rsatmoqda.