Xomanaiy va halok bo‘lgan bolalar xotirasiga Toshkentda gullar qo‘yildi

5-mart kuni Toshkent shahrida joylashgan Eron elchixonasi binosi qarshisida Eron oliy rahbari Ali Xomaniy vafoti munosabati bilan hamdardlik burchagi tashkil etildi. Elchixona darvozasi oldiga kelgan fuqarolar marhum xotirasini yod etib, gullar qo‘ydi. Shuningdek, bu yerda o‘yinchoqlar va qo‘g‘irchoqlar ham qoldirildi. Bu ramziy buyumlar yaqinda Eron hududida yuz bergan fojiada halok bo‘lgan bolalar xotirasiga bag‘ishlab qo‘yilgani aytilmoqda.

Ma’lumotlarga ko‘ra, 28-fevral kuni AQSh va Isroil tomonidan Eronga aviazarbalar berilgani haqida xabarlar tarqalgan. Hujumlar davomida Tehron va boshqa shaharlarda kuchli portlashlar qayd etilgan.

Shuningdek, Eronning Minob okrugidagi qizlar maktabining o‘qqa tutilishi oqibatida halok bo‘lgan 165 nafar bola va o‘qituvchining ommaviy dafn marosimlari bo‘lib o‘tgan.

Toshkentdagi elchixona oldida qoldirilgan o‘yinchoqlar va qo‘g‘irchoqlar aynan bolalar o‘limi tufayli yuz bergan fojiaga hamdardlik ramzi sifatida qo‘yilgani ta’kidlanmoqda.