Eron urushni to‘xtatish uchun yangi taklif bilan chiqdi: AQSh bunga rozi bo‘ladimi?

So‘nggi kunlarda Eron va AQSh o‘rtasidagi keskinlik yana kuchayib bormoqda. Ushbu vaziyat fonida Eron urushni tugatish uchun yangi taklif bilan chiqdi. Bu taklif yadro masalasini chetga surib, boshqa yo‘l bilan kelishishga qaratilgan. Xo‘sh, bu safar tomonlar kelisha oladimi?

Eron nimani taklif qildi?

Ma’lumotlarga ko‘ra, Eron AQShga Hormuz bo‘g‘ozini qayta ochish va urushni to‘xtatish bo‘yicha taklif bergan. Bu taklif Pokiston orqali yetkazilgan.

Eron bu safar yadroviy dastur masalasini vaqtincha chetga surib, avvalo dengiz blokadasini bekor qilish va keskinlikni kamaytirishni taklif qilmoqda. Ularning maqsadi — asosiy tortishuvni chetlab o‘tib, tezroq kelishuvga erishish.

AQSh nima demoqda?

AQSh esa bu masalada o‘z pozitsiyasini o‘zgartirmayapti. Donald Tramp ma’muriyati Eronni uranni boyitishdan voz kechishga majburlash uchun aynan dengiz blokadasidan foydalanmoqda.

Tramp bu bosim tez orada natija berishini aytgan. Hozir u milliy xavfsizlik jamoasi bilan bu masalani muhokama qilishi kutilmoqda. AQSh tomoni kamida 10 yil davomida Eron uranni boyitmasligini va mavjud zaxiralarni mamlakatdan chiqarib yuborishini talab qilmoqda. Oq uy ham muzokaralar davom etayotganini tasdiqladi, lekin ular faqat o‘zlariga mos keladigan kelishuvga rozi bo‘lishini aytgan.

Muzokaralar nega cho‘zilyapti?

So‘nggi uchrashuvlar ham natija bermadi. Eron tashqi ishlar vaziri Abbos Aroqchining Pokistonga safari foyda bermadi. Shundan keyin Tramp o‘z vakillarining Islomobodga borishini ham bekor qildi.

Avvalroq tomonlar Islomobodda 21 soat muzokara o‘tkazgandi, lekin hech qanday kelishuvga erisha olmagan. Hozir esa Aroqchi Moskvaga borib, Rossiya prezidenti Vladimir Putin bilan uchrashishi kutilmoqda. Eron bu uchrashuvlarda o‘zining “qizil chiziqlari”ni aniq qilib qo‘yganini aytmoqda.