Tanqidlar ostida qolayotgan O‘zbekiston milliy terma jamoasi bosh murabbiyning “oyligi” qancha?

Terma jamoaning so‘nggi o‘yinlaridan so'ng, umuman olganda esa kelganidan bir yil o‘tib hamki, ko‘pchilik mutaxassislarning noroziligiga sabab bo‘layotgan Srechko Katanesning oylik maoshi qancha ekanligi bilan qiziqib ko‘rdik.

Shartnoma

2021-yilning 27-oktyabr kuni Srechko Katanesning O‘zbekiston futbol assotsiatsiyasi bilan shartnoma imzolash marosimi bo‘lib o‘tgan. Shartnomaga ko‘ra, sloveniyalik mutaxassis 2025-yilga qadar O‘zbekiston milliy terma jamoasi bosh murabbiyi sifatida faoliyat yuritadi. OAV ma’lumotlariga ko‘ra, mutaxassisning maoshi yiliga 1,2 million dollarni tashkil etadi.

Murabbiy haqida

Srechko Katanes 1963-yilda Sloveniyaning Lyublyana shahrida tavallud topgan. 1981-1994-yillar davomida “Partizan”, “Shtutgart”, “Sampdoriya” kabi jamoalarda to‘p surgan. Ushbu davr mobaynida A-Seriya va Italiya kubogini qo‘lga kiritgan, shuningdek, UYEFA Championlar ligasi va UEFA Kubogi final uchrashuvlarida ishtirok etgan hamda Yevropa Kubok egalari kubogida zafar quchgan. Murabbiylik faoliyatida esa Makedoniya, Birlashgan Arab Amirligi, Sloveniya va Iroq milliy terma jamoalarini boshqargan. U Sloveniya bilan Yevro-2000 va JCH-2002da qatnashgan. Shuningdek, Osiyo Kubogi-2019da Iroqni boshqaradi.

Murabbiylarning oylik maoshlari

Ma’lum bo‘lishicha, milliy jamoani Katanesdan avval boshqargan Vadim Abramov oyiga 250 million so‘m ish haqi olgan. Mutaxassisning o‘sha vaqtlar "Bunyodkor"dagi maoshi 60-65 million so‘m atrofida bo‘lgan. Katanesning O‘zbekistonga kelgunga qadar Iroqdagi maoshi esa 1,2 mln. yevroga teng bo‘lgan. Solishtirish uchun yana bir qancha raqamlarni keltirishimiz mumkin. 2018-yil holatiga ko‘ra, Fors futboli rivojiga ulkan hissa qo‘shgan Karlos Keyrushning Erondagi yillik maoshi 2 mln. yevroga teng bo‘lgan. O‘zbekistonning yana bir sobiq murabbiyi va Misrni 28-yillik tanaffusdan keyin JCHga olib chiqqan Ektor Kuperning yillik maoshi 1,5 mln. yevroni tashkil qilgan.