Dam olish kunlari O‘zbekistonda havo salqinlashadi

Dam olish kunlari mamlakatning katta qismida yomg‘ir kutilmaydi, harorat esa kunduzi 25–30 daraja atrofida bo‘ladi. Ayrim hududlarda kuchli shamol va chang-to‘zon ham kuzatilishi mumkin. Toshkentda ham harorat sezilarli pasayadi.

Issiq biroz chekinadi

O‘zgidromet ma’lumotiga ko‘ra, dam olish kunlari O‘zbekiston bo‘ylab havo asosan kam bulutli va quruq bo‘ladi. Kunduz kuni harorat 25–30 darajagacha tushadi. Ayrim joylarda 32 daraja, janubiy hududlarda esa 35 darajagacha issiq bo‘lishi mumkin.

11-sentyabr kuni esa mamlakatning katta qismida harorat hali 32–35 daraja atrofida saqlanadi. Shimoli-g‘arbiy hududlarda nisbatan salqinroq — 23–28 daraja bo‘lishi kutilmoqda.

Ayrim joylarda shamol va chang-to‘zon bo‘ladi

11–12-sentyabr kunlari ayrim hududlarda shamol tezligi 13–18 metr/sekundgacha kuchayishi mumkin. Ba’zi joylarda bu chang-to‘zon bilan birga kuzatiladi.

Orolbo‘yi va Toshkent viloyatining ayrim joylarida qisqa muddatli yomg‘ir yog‘ishi mumkin. Tog‘li hududlarda ham 11–12-sentyabr kunlari yomg‘ir ehtimoli bor, 13-sentyabrda esa yog‘ingarchilik kutilmaydi.

Toshkentda harorat 28 darajagacha tushadi

Toshkentda 11-sentyabr kuni kunning birinchi yarmida qisqa muddatli yomg‘ir yog‘ishi mumkin. Kunduzi harorat 33–35 daraja bo‘ladi.

Dam olish kunlari esa poytaxtda yomg‘ir kutilmaydi. Kechasi harorat 16–18 darajagacha tushadi. Shanba kuni kunduzi 28–30 daraja, 13-sentyabrda esa 30–32 daraja bo‘lishi kutilmoqda.