Yevropa yana Rossiya gaziga qaytadimi? Vengriya bosh vaziri bahsli bayonot berdi

Vengriya bosh vaziri Peter Magyar urush tugaganidan keyin butun Yevropa yana Rossiya gazini sotib ola boshlashi mumkinligini aytdi. Uning fikricha, bunga asosiy sabab Rossiya gazining arzonligi va geografik jihatdan qulay joylashgani bo‘ladi. Bu bayonot Yevropa Rossiya nefti va gazidan voz kechishga urinayotgan bir paytda yangradi.

Xo‘sh, urush tugagach Yevropa yana eski energetik hamkorlikka qaytadimi?

“Rossiya gazi baribir arzonroq”

Peter Magyar urush tugashi bilan Yevropa davlatlari iqtisodiy manfaat sabab yana Rossiya gaziga murojaat qilishi mumkinligini aytdi. Unga ko‘ra, bu siyosatdan ko‘ra ko‘proq narx va raqobat masalasi hisoblanadi.

Vengriya bosh vaziri Polsha va Boltiq dengizi orqali kelayotgan suyultirilgan LNG gazining narxi Ruminiya, Rossiya yoki Avstriyadan olinadigan gazga qaraganda ancha qimmat ekanini ta’kidlagan. Shu bilan birga, u Polsha bosh vaziri Donald Tusk LNG narxini tushirish uchun qo‘lidan kelganini qilishga va’da berganini ham aytgan.

Magyarning fikricha, bir nechta manbadan gaz olish Vengriya uchun foydali, chunki bu energiya xavfsizligini oshiradi va narx bo‘yicha yaxshiroq muzokara qilish imkonini beradi. Shu sabab mamlakat yangi gaz tarmoqlari va ulanish loyihalarini ham rivojlantirmoqchi.

Vengriyada siyosiy o‘zgarish va energiya xavfi bir paytga to‘g‘ri keldi

Aytilishicha, Viktor Orban saylovdagi mag‘lubiyatidan keyin Vengriya katta siyosiy o‘zgarishlar bosqichiga kirgan. Shu bilan birga, mamlakat energiya barqarorligi bilan bog‘liq muammolarga ham duch kelmoqda. Neft zaxiralari kamayib borayotgani hukumat oldiga murakkab vazifalarni qo‘ymoqda.

Peter Magyar hukumati hozir yoqilg‘i inqirozining oldini olish va energiya tizimini barqarorlashtirishga urinmoqda. Mutaxassislar bu reja amalga oshmasa, nafaqat Vengriya, balki Ukraina uchun ham oqibatlari bo‘lishi mumkinligini aytmoqda.

Magyar energiya masalasida pragmatik yondashayotganini, asosiy maqsad esa aholi uchun arzon va barqaror energiya ta’minoti ekanini bildirgan. U “meni tanqid qilishayotganini bilaman, lekin xalq mendan energiya xavfsizligi va past narxlarni kutmoqda”, degan.

Rossiya energiyasidan voz kechish bo‘yicha bahslar davom etmoqda

Peter Magyar Yevropa Ittifoqining keyingi uch yil ichida Rossiya nefti va gazidan butunlay voz kechish rejasi ham urush tugagach o‘zgarishi mumkinligini aytdi. Uning fikricha, Yevropa davlatlari raqobatbardosh bo‘lishi uchun energiya narxlarini tushirishi kerak bo‘ladi.

Shu bilan birga, 2025-yilda Bolgariyadagi Demokratiyani o‘rganish markazi va Finlyandiyadagi CREA markazi Vengriya va Slovakiya Rossiya nefti va gazidan voz kechish imkoniyatiga ega bo‘lsa-da, buni atay qilmayotganini bildirgan. Ularning fikricha, bu holat Yevropa Ittifoqining energetik xavfsizlik strategiyasi va Rossiyaga qarshi sanksiyalar siyosatiga zid hisoblanadi.

Avvalroq vengriyalik energetika eksperti Richard Demeny ham hozircha Vengriya “Drujba” quvuridan foydalanishda davom etishini, Yevropa Ittifoqi va Ukraina esa yangi hukumatga vaqt berish uchun bunga to‘sqinlik qilmayotganini aytgandi.