Soxta prokuratura: O‘zbekistonda tez sur’atda keng tarqalayotgan yangi firibgarlik usuli

So‘nggi kunlarda o‘zbekistonliklarga “Samarqand prokuraturasi xodimlari” va boshqa viloyatlardan qo‘ng‘iroqlar kela boshladi, deb yozmoqda Vaib blogi. Ular tashvishli “xabar” berishmoqda. Unga ko‘ra, go‘yo hududdagi firibgar boshqa odamlarning nomiga onlayn kreditlar olgan emish va uning telefonidan sizning aloqa ma’lumotlaringiz topilgan ekan.

Bu qanday ishlaydi?

Unga ko‘ra, sizga telefon qilib, prokuratura xodimi sifatida o‘zini tanishtiradi va “sizning nomingizga kredit olgan yoki olmoqchi bo‘lgan” firibgar haqida gapirishni boshlaydi. Shundan so‘ng suhbatga “tergovchi” qo‘shiladi va “bayonnoma uchun” sizning ma’lumotlaringizni talab qiladi. Ularga shaxsiy ma’lumotlaringiz keyinchalik kartangizdan pul yechib olish yoki haqiqatan ham onlayn kredit rasmiylashtirish uchun kerak bo‘ladi. Bunda vaziyat ishonchli tuyuladi, suhbatdoshlar savodli gapiradi, qonunlarga havola qiladi, moddalarni keltirib o‘tadi, ismlar va hatto faktlarni ham aytadi.

Nima qilish kerak?

Jabrlangan ayollardan biri o‘z tajribasi bilan o‘rtoqlashdi:

“Men avvaliga esankirab qoldim, savollar bera boshladim. Go‘shakni “tergovchi” olib, go‘yo meni Samarqandga chaqirtirmaslik uchun ma’lumotlarimni talab qilganda, bu firibgarlik ekanligini tushundim. Men bilan tuman prokuraturasi orqali bog‘lanishlarini aytdim va telefonni o‘chirib qo‘ydim”.

Maslahatlar:

▪️Telefon orqali shaxsiy ma’lumotlaringizni hech qachon aytmang.

▪️Agar sizni qo‘rqitishga yoki shoshirishga harakat qilishsa, bu deyarli aniq firibgarlardir.

▪️Shubhangiz paydo bo‘lishi bilan suhbatni darhol to‘xtating.

▪️Qo‘ng‘iroq haqida huquqni muhofaza qilish organlariga xabar bering.

Firibgarlar tobora topqirroq bo‘lib bormoqda, shuning uchun faqat sizning e’tiborliligingiz va hushyorligingiz sizni aldovdan himoya qila oladi. Mazkur vaziyat yuzasidan Bosh prokuratura rasmiy munosabat bildirgani yo‘q.