Prezident maktabi nufuzli xalqaro mukofotning g‘olibi bo‘ldi

Prezident yordamchisi Saida Mirziyoyeva o‘z sahifasida Prezident maktabi nufuzli xalqaro mukofotning “Global o‘rta maktablar” nominatsiyasida g‘olib bo‘lganini ma’lum qildi. 

Ta’lim tizimimiz e’tirofi

“Ta’lim tizimimizning yutuqlari xalqaro maydonda yana bir bor e’tirof etildi. Toshkent shahridagi Prezident maktabi Shayx Zoid Ol Nahayon nomidagi nufuzli mukofotning “Global o‘rta maktablar” nominatsiyasida g‘olib deb topildi”, deb yozadi Saida Mirziyoyeva. “Yoshlarimizning bu ajoyib muvaffaqiyati barchamizga g‘urur va iftixor bag‘ishlaydi, shuningdek, Prezidentimiz tanlagan barqaror va “yashil” rivojlanish yo‘li naqadar to‘g‘ri ekanligini yana bir bor tasdiqlaydi”, deya qo‘shimcha qiladi Prezident yordamchisi.

Tanlov haqida

Qayd etilishicha, 156 ta davlatdan jami 5 980 ta ariza kelib tushgan tanlovda maktab o‘quvchilari Pahlavon G‘ulomov va Asilbek Ashrapov hamda ularning ustozi Sohibxon Azizov yomg‘ir suvini ichishga yaroqli darajagacha qayta ishlash loyihasi bilan g‘oliblikni qo‘lga kiritishgan. Abu-Dabida bo‘lib o‘tgan taqdirlash marosimida mukofotni o‘quvchilarga Birlashgan Arab Amirliklari Prezidenti Shayx Muhammad bin Zoid Ol Nahayon shaxsan topshirgan.