Raqamli sog‘liqni saqlash platformasi yaratiladi

O‘zbekiston tibbiyoti qog‘ozbozlikdan butunlay voz kechmoqda. Endilikda barcha tibbiyot muassasalari yagona raqamli platformaga integratsiya qilinib, davlat tashkilotlari bilan elektron ma’lumot almashinuvi yo‘lga qo‘yiladi.

Byurokratiyaga barham

Prezidentning 2023-yil 1-maydagi “Sog‘liqni saqlash tizimini raqamlashtirishga doir qo‘shimcha chora-tadbirlar to‘g‘risida”gi qaroriga binoan, O‘zbekiston tibbiyoti qog‘ozbozlikdan butunlay voz kechmoqda. Endilikda barcha tibbiyot muassasalari yagona raqamli platformaga integratsiya qilinib, davlat tashkilotlari bilan elektron ma’lumot almashinuvi yo‘lga qo‘yiladi. Hamkorlik shartnomasi Sog‘liqni saqlash vaziri Asilbek Xudayarov va “UZINFOCOM” MCHJ bosh direktori Emil Gimranov tomonidan imzolandi.

Loyiha Germaniya taraqqiyot banki kredit va grant mablag‘lari hisobidan amalga oshiriladi

Qarorda sog‘liqni saqlash tizimiga ilg‘or raqamli texnologiyalarni tatbiq etish, raqamli sog‘liqni saqlash platformasini yaratish, sohaning barcha darajalaridagi davolash-profilaktika muassasalari uchun ma’lumotlar bazasi kompleksini joriy etish, dasturiy ta’minot va elektron platformani ishlab chiqishga doir ustuvor vazifalar belgilangan.

Xususan, qarorda “Raqamli sog‘liqni saqlash islohotlarini qo‘llab-quvvatlash” loyihasi Germaniya taraqqiyot banki (KfW banki) kredit va grant mablag‘lari hisobidan amalga oshirilishi belgilangan. Raqamli sog‘liqni saqlash platformasini yaratish — mazkur istiqbolli loyihaning birinchi tarkibiy qismidir.

Raqamli sog‘liqni saqlashning afzalliklari

Yangi platforma sog‘liqni saqlash tizimiga zamonaviy texnologiyalarni joriy etadi. Bu orqali:

 • Tibbiyot muassasalari o‘rtasida yagona tizim yaratiladi;

 • Elektron ma’lumotlar almashuvi tezkorlikni oshiradi;

 • Ish jarayonlarida vaqt va resurslar tejab qolinadi;

 • Ish unumdorligi sezilarli darajada oshadi

 • Davolash va profilaktika xizmatlari sifatini yaxshilashga zamin yaratiladi.