O‘zbekiston terma jamoasi sardorining taqdiri yana mavhum bo‘lib qoldi

“Roma” hujumchisi Eldor Shomurodov qishki transfer oynasida Rim klubini tark etishi kutilmoqda. 

Kutilmagan va kutilgan o‘zgarishlar

Insayder Nikola Skiraning yozishicha, “Roma” Eldor bilan kelishuvni 2026-yildan 2027-yilga qadar uzaytirgan bo‘lsa-da, o‘zbek hujumchisi Klaudio Raniyerining rejalaridan muhim o‘rin olmagan. Shu bois, rimliklar qishki transfer oynasida Shomurodov bilan xayrlashishi mumkin. Qiziqarlisi, Eldor Shomurodovdan tashqari jamoaning eng mashhur yulduzi Paulo Dibala va ko‘p yillik sardori Lorenso Pellegrinining ham Rimda qolishi katta so‘roq ostida turibdi.

Bu birinchisi emas

Umuman olganda Shomurodov 2021-yilning yozida Rim klubiga ko‘chib o‘tganidan beri har transfer oynasi arafasida “Roma”ni tark etishi haqida xabarlar tarqatiladi. Xususan, yozda ham klub 29 yoshli hujumchi bilan xayrlashishga yaqin turgandi, lekin o‘sha paytdagi bosh murabbiy Daniele De Rossi kutilmaganda Eldor haqidagi fikrini o‘zgartirib, uni jamoada olib qolgandi.

Ehtimoliy kutilmalar

29 yoshli hujumchi joriy mavsum A Seriyada 7 o‘yinda bitta gol va assistga mualliflik qildi. Italiya kubogida ham bir o‘yinda bitta gol urdi. Yevropa ligasida esa 4 o‘yinda samaradorlik ko‘rsatmadi. Eldor o‘tgan yilgidek A Seriya klublaridan biriga yarim yillik ijaraga berilishi mumkinligi ehtimoliy yuqori. Hozirga qadar o‘zbek futbolchisiga ikkita jamoa qiziqish bildirgani haqida ma’lumotlar chiqqan edi. Ulardan biri mashhur futbolchilarni o‘zida jamlayotgan A Seriya debyutanti “Komo” va ikkinchisi V Seriyada qolish uchun kurashayotgan “Salernitana”.