2027-yilda to‘qimachilik va tikuv-trikotaj sanoati eksporti 7 milliard dollarga yetkaziladi

O‘zbekiston Respublikasi Prezidenti tomonidan “To‘qimachilik va tikuv-trikotaj sanoatida qayta ishlash zanjirini rivojlantirish bo‘yicha qo‘shimcha chora-tadbirlar to‘g‘risida”gi farmon imzolandi. Ushbu hujjat sohani rivojlantirish, eksport hajmini oshirish va xalqaro bozorlarga chiqish uchun yangi imkoniyatlar yaratishga qaratilgan.

Eksport hajmini oshirish bo‘yicha maqsadlar

Farmonga ko‘ra, 2025–2027-yillar davomida to‘qimachilik va tikuv-trikotaj sanoatida eksport hajmini oshirish bo‘yicha muhim ko‘rsatkichlar belgilangan. Rejaga ko‘ra, 2025-yilda eksport hajmi 4 milliard dollarga, 2026-yilda 5 milliard dollarga, 2027-yilda esa 7 milliard dollarga yetkazilishi ko‘zda tutilgan. Shuningdek, AQSh va Yevropa davlatlariga tayyor mahsulotlar eksporti 500 million dollarni tashkil etishi rejalashtirilgan.

Tayyor mahsulot ulushini oshirish

Ilg‘or texnologiyalar va zamonaviy dizayn ishlanmalarini keng joriy qilish orqali tayyor tikuv-trikotaj mahsulotlarining umumiy eksportdagi ulushi 70 foizga yetkaziladi. Ushbu maqsad xalqaro brendlarni jalb qilish va innovatsion yondashuvlarni tatbiq etish orqali amalga oshiriladi.

Sohani qo‘llab-quvvatlash mexanizmlari

To‘qimachilik tarmog‘ida qayta ishlashni chuqurlashtirish va ishlab chiqaruvchilar uchun qulay moliyaviy sharoitlar yaratish bo‘yicha yangi mexanizmlar joriy etiladi. 5 milliard dollar miqdorida xorijiy investitsiyalar va kreditlar jalb qilinishi rejalashtirilgan.

Mahalliy mahsulotlarni xalqaro bozorlarga chiqarish

“Made in Uzbekistan” dasturi orqali mahalliy mahsulot va brendlarni xalqaro “marketplace”larda targ‘ib qilish, joylashtirish va reklama qilish ishlari yo‘lga qo‘yiladi.

Shuningdek, farmon asosida “Savdoni rivojlantirish kompaniyasi” AJ qoshida faktoring tashkiloti tashkil etiladi.