“Yagona integratsiyalashgan ekotizim” axborot tizimi ishga tushiriladi
Prezident farmoni bilan sanoat xavfsizligi va nazorat tizimiga yangiliklar kiritilmoqda.
1 daqiqa o‘qiladi
24-dekabr kuni O‘zbekiston Respublikasi Prezidentining “Sanoat, radiatsiya va yadroviy xavfsizlik sohasida davlat nazoratini takomillashtirish bo‘yicha qo‘shimcha chora-tadbirlar to‘g‘risida”gi farmoni qabul qilindi. Ushbu farmonga ko‘ra, sanoat xavfsizligi bo‘yicha yangi qoidalar va tizimlar joriy etilmoqda.
Sanoat xavfsizligi nazoratida yangi vazifalar
2025-yil davomida Sanoat, radiatsiya va yadroviy xavfsizlik qo‘mitasi rahbariyati quyidagi ustuvor vazifalarni bajarishi lozim:
- Sanoat, radiatsiya va yadroviy xavfsizlik qoidalarini qayta ko‘rib chiqish.
- Masofadan turib sanoat xavfsizligini nazorat qilish mexanizmini joriy etish.
- Xavfsizlik qoidalarini buzganlik uchun javobgarlik choralarini kuchaytirish.
Yangi inspeksiyalar tashkil etiladi
Farmonga binoan, tog‘-kon sanoati va geologiya sohasini nazorat qilish inspeksiyasining metallurgiya xavfsizligini nazorat qilish funksiyalari Qo‘mitaga o‘tkaziladi hamda Bekobod kon-texnika inspeksiyasi tugatiladi.
Shuningdek, quyidagi yangi inspeksiyalar tashkil etiladi:
- Navoiy sanoat xavfsizligi inspeksiyasi.
- Olmaliq sanoat xavfsizligi inspeksiyasi.
- Bekobod sanoat xavfsizligi inspeksiyasi.
- Temir yo‘l sanoat xavfsizligi inspeksiyasi.
“Yagona integratsiyalashgan ekotizim”
2025-yil oxirigacha “Yagona integratsiyalashgan ekotizim” axborot tizimi ishga tushiriladi. Ushbu tizim sanoat xavfsizligini nazorat qilish va monitoring qilishda muhim rol o‘ynaydi.
2025-yil 1-iyuldan boshlab sanoat, radiatsiya va yadroviy xavfsizlik sohasidagi qoidabuzarliklar uchun yuridik shaxslarga jarima qo‘llash tartibi joriy etiladi.
