AQSh universitetlari xalqaro talabalarga Tramp hokimiyatga kelishidan avval mamlakatga qaytishni tavsiya qilmoqda

AQShda Prezident saylangan Donald Trumpning 2025-yil 20-yanvardagi inauguratsiyasi oldidan ko‘plab universitetlar xalqaro talabalarni qishki ta’tildan oldinroq qaytib kelishga chaqirmoqda. Trump saylovoldi kampaniyasida avvalgi muddatida amalga oshirgan sayohat taqiqini kengaytirish, ayrim mamlakatlar fuqarolariga viza berishni cheklash va “anti-Amerika” qarashlari uchun talabalar vizalarini bekor qilish rejasini e’lon qilgan. Bu haqda CNN nashri xabar berdi.

Bir milliondan ortiq xorijiy talaba

Telekanal ma’lumotlariga ko‘ra, AQShda bir milliondan ortiq xorijiy talabalar ta’lim oladi, ammo Trampning prezidentlikka qaytishi sababli ayrimlari o‘qishni tugatishga ulgurmaslikdan xavotirda. Masalan, Kornel universiteti chet elga ketayotgan talabalarga bahorgi semestr boshlanishidan oldin qaytishni yoki o‘z sayohat rejalari haqida maslahatchi bilan bog‘lanishni va kechikishlarga tayyor bo‘lishni tavsiya qildi.

“Sayohat cheklovlari, ehtimol, inauguratsiyadan ko‘p o‘tmay kuchga kiradi,” — deya ogohlantirdi universitet.

Bahorgi semestrdan avval mamlakatga kirib olish kerak

Janubiy Kaliforniya universiteti esa talabalariga elektron xatlar jo‘natib, bahorgi semestr boshlanishidan oldin AQShda bo‘lish “har qanday muammolarni oldini olishning eng xavfsiz yo‘li” ekanligini ta’kidladi.

Xalqaro talabalar kelajakdan xavotirda, ba’zilar esa yangi ma’muriyat boshlanishidan oldin immigratsion siyosatdagi o‘zgarishlardan qo‘rqmoqda. Ko‘plab universitetlar talabalarini himoya qilish uchun resurslar taqdim etib, maslahatlar bermoqda.

Grin-karta va’dasi

Iyunda prezidentlikka nomzod Tramp AQSh kollejlari bitiruvchilariga avtomatik ravishda yashash guvohnomasi (grin-karta) berishni va’da qilgan edi. Biroq uning saylovoldi kampaniyasi vakilasi Kerolayn Levitt keyinchalik faqat “eng malakali bitiruvchilarga” grin-karta berilishini ma’lum qildi.