Maktab va texnikum oshxonalari tadbirkorlarga “E-auksion” orqali ijaraga beriladi
Buning uchun tadbirkor davlat ro‘yxatidan o‘tgan, kamida 6 oylik tajribaga ega bo‘lishi, faoliyat uchun zarur jihozlarga ega bo‘lishi va hech qanday qarzdorligi bo‘lmasligi talab etiladi.
1 daqiqa o‘qiladi
Hukumat qarori bilan (8-son, 11.01.2025 y.) Vazirlar Mahkamasining qaroriga o‘zgartirish va qo‘shimchalar kiritildi.
Tanlov asosida
Qarorga ko‘ra, Vazirlar Mahkamasining132-sonqaroriga quyidagilarni nazarda tutuvchi o‘zgartirish va qo‘shimchalar kiritildi:
umumiy o‘rta va o‘rta maxsus, kasbiy ta’lim tashkilotlari oshxonalarini tadbirkorlik subyektlariga “E-auksion” elektron savdo platformasi orqali tanlov asosida ijaraga berish;
“online-ijara.uz” axborot tizimi orqali ta’lim tashkilotlari oshxonalarining hisobini yuritish va ularni ijaraga berish;
ta’lim tashkilotlarida sog‘lom ovqatlanish tashkil etilishini monitoring va nazorat qilish;
respublika ijro etuvchi hokimiyat organlari nomlarini qonunchilik hujjatlariga muvofiqlashtirish.
Shartlar qanday?
Quyidagi talablarga javob beradigan ijaraga oluvchilar tanlovda ishtirok etishlari mumkin:
tadbirkorlik faoliyatini yuritish uchun davlat ro‘yxatidan o‘tgan;
umumiy ovqatlanish bo‘yicha kamida 6 oy davomida faoliyat yuritayotgan;
oshxona faoliyati yo‘nalishi bo‘yicha maxsus jihozlarga ega bo‘lgan;
shartnoma va sud hujjatlari bo‘yicha zimmasida ijara hamda soliq to‘lovlaridan qarzdorligi mavjud bo‘lmagan.
