Markaziy bank iqtisodiy me’yorlarga rioya qilmagan 13 ta moliyaviy tashkilotga sanksiyalar qo‘lladi

Markaziy bankning Bank nazorati qo‘mitasi tomonidan joriy yilning iyun oyidagi yig‘ilishlarida 42 ta masala ko‘rildi va ular bo‘yicha tegishli qarorlar qabul qilindi. Bu haqida Markaziy bank matbuot xizmati xabar berdi. 

Ro‘yxatga olish va ruxsat berish yo‘nalishida 28 ta masala

Ro‘yxatga olish va ruxsat berish yo‘nalishida 28 ta masala muhokama qilindi.

Shu jumladan, kredit tashkilotlari ustaviga kiritilgan o‘zgartirishlarni ro‘yxatdan o‘tkazish (5 ta), mikromoliya tashkilotlari faoliyatini amalga oshirish uchun litsenziya berish, mikromoliya tashkilotlariga berilgan lisenziyalarni qayta rasmiylashtirish (9 ta), mikromoliya tashkilotlariga berilgan litsenziyalarni chaqirib olish (1 ta), banklarda audit o‘tkazish huquqini berish uchun auditorlik malaka sertifikatini taqdim etish (1 ta) hamda tijorat banklari kuzatuv kengashi va boshqaruvi a’zolari, shuningdek, muhim ahamiyatga ega xodimlarining nomzodlarini ko‘rib chiqishga doir (10 ta) masalalar ko‘rildi.

Iqtisodiy me'yorlarga amal qilinmagan moliyaviy tashkilotlarga nisbatan sanksiyalar 

Kredit tashkilotlarining moliyaviy holatiga oid 14 ta masala – Markaziy bankning ko‘rsatmalari va prudensial me’yorlari talablarining bajarilishi, banklar va mikromoliya tashkilotlarida o‘tkazilgan tekshirishlar natijalari ham muhokama qilindi.

Markaziy bank tomonidan o‘rnatilgan iqtisodiy me’yorlar talablariga rioya qilinmaganligi hamda Markaziy bankka taqdim etilgan ma’lumotlarda noaniqliklarga yo‘l qo‘yilganligi va tekshirish natijalarida aniqlangan qoidabuzarliklar uchun 11 ta bank, 1 ta mikromoliya tashkiloti va 1 ta lombardga nisbatan jarima sanksiyasi qo‘llanildi.

Barqarorlikni ta’minlash bo’yicha ko’rsatmalar berildi

Bundan tashqari, Qo‘mita tomonidan bank tizimi barqarorligini saqlash, omonatchilar va investorlar huquqlarini himoya qilish tamoyilidan kelib chiqib, tijorat banklari boshqaruvlari va mikromoliya tashkilotlari rahbariyatlariga aniqlangan kamchiliklarni tuzatish, ular bo‘yicha tegishli chora-tadbirlar ishlab chiqish, o‘rnatilgan prudensial normativlarga amal qilish, bank faoliyatida mavjud zaifliklarni bartaraf etish va moliyaviy holatini sog‘lomlashtirishga qaratilgan talablarga rioya qilish yuzasidan tegishli ko‘rsatmalar berildi.