Mikrokreditbank va Biznesni rivojlantirish banki o‘tgan yilni katta zarar bilan yakunladi

2024-yilda O‘zbekiston tijorat banklarining umumiy sof foydasi 6,96 trillion so‘mni tashkil etdi, bu esa o‘tgan yilga nisbatan qariyb ikki barobar kam. Bu haqida Bankers.uz xabar berdi. 

 Davlat banklari tarixiy darajada zarar ko‘rdi  

2024-yilda davlat ulushiga ega banklar jami 317,2 milliard so‘m zarar ko‘rdi. Eng yirik zararlarni Mikrokreditbank (-1,7 trillion so‘m) va Biznesni rivojlantirish banki (-2,2 trillion so‘m) qayd etdi. Aloqabank, Agrobank va Asakabank ham o‘tgan yilga nisbatan ancha past natijalarga erishdi.  

Shunga qaramay, O‘zsanoatqurilishbank va O‘zmilliybank sof foyda bo‘yicha yetakchilar qatoridan joy oldi. O‘zsanoatqurilishbank o‘tgan yilga nisbatan 43% o‘sish bilan 1,3 trillion so‘m sof foyda oldi. Xalq banki ham 8,1% o‘sish bilan ijobiy natija qayd etdi.  

Davlat banklari umumiy moliyaviy ko‘rsatkichlar bo‘yicha so‘nggi yillardagi eng yirik pasayish bilan yuzlashdi.  

 Xususiy banklarda muvozanat  

Davlat nazoratida bo‘lmagan banklar esa 7,3 trillion so‘m sof foyda ko‘rdi. Yetakchilar qatorida Hamkorbank (1,42 trillion so‘m) va Kapitalbank (1,16 trillion so‘m) bor. Biroq, Kapitalbankning sof foydasi o‘tgan yilga nisbatan 29,1% kamaydi.  

Eng yuqori o‘sish TBC Bank (+748,5%) tomonidan qayd etildi. Shuningdek, Octobank (+101,7%) va Uzum Bank (+121,4%) ham ijobiy natijalar ko‘rsatdi.  

Biroq, Ipoteka bank, 2023-yilda 800 milliard so‘m foyda olgan bo‘lsa, 2024-yilda 240 milliard so‘mdan ortiq zarar ko‘rdi. Bundan tashqari, Hayot Bank, Yangi Bank, Apex Bank, AVO Bank va Yevroosiyo banklari ham yilni zarar bilan yakunladi.  

 Tijorat banklarining moliyaviy natijalari qanday o‘zgardi?  

Banklarning 2024-yilgi moliyaviy natijalari o‘tgan yilga nisbatan jiddiy o‘zgarishlarga uchradi. Ba’zi banklar og‘ir yo‘qotishlarga duch keldi, boshqalari esa rekord darajadagi daromad oldi. Quyidagi infografikada barcha banklarning 2024-yil natijalari 2023-yil bilan solishtirilgan holda ko‘rsatilgan: