Metro kassalarida ATTO kartalari qayerga yo‘qolmoqda?

Toshkent shahrida avtobuslarda naqd pul qabul qilishning bekor qilinishi transport kartalari taqchilligini yuzaga keltirdi. ATTO kompaniyasi kartalarni chayqovchilar ommaviy ravishda sotib olayotganini tushuntirdi. 

Chayqovchilik sabab ATTO kartalari yetishmayapti

ATTO kompaniyasining direktori Davron Shoyoqubovning ta’kidlashicha, 2024-yilda fuqarolar jami 200 ming, dekabr va yanvar oyining birinchi 9 kunida esa 110 ming karta xarid qilgan.

“Yo‘lovchilar qo‘ng‘iroq qilib, kartalar narxini oshirganimizni aytishdi. Kassalarda kartalar yo‘q, lekin metroga kiraverishda ularni 30−40−50 mingga sotishyapti, deyishdi. Ma’lum bo‘lishicha, chayqovchilar kartalarni xarid qilib, ularni qayta sotayotgan ekan”, — ATTO direktori.

Bir kishiga ikkitadan ortiq karta sotilmaydi

Mazkur muammoga qarshi kurashish maqsadida ATTO kompaniyasi bir kishiga faqat ikkitadan karta sotishni cheklovchi choralarni joriy etdi. Bundan tashqari, 10-yanvar kuni 50 ming dona yangi karta savdoga chiqarilgan, ammo ular tezda tugagan. Yanvar oyining oxirigacha yana 200 ming dona karta chiqarilishi rejalashtirilmoqda.  

Faol kartalar 1,7 million, ammo ulardan faqat 300 mingtasi ishlatilmoqda

Shuningdek, ko‘p sonli kartalar faollashtirilmagan holda saqlanmoqda. Hozirda aholining qo‘lida 1,7 mln karta mavjud. Har kuni yo‘lovchilar avtobuslarda 500 marta, metrodagi sayohatlarda esa 140 marta to‘lov amalga oshiradi.

“Jami bu 640 ming qatnov va taxminan 300 mingga yaqin yo‘lovchini tashkil etadi. Bu degani 1,7 mln kartadan faqat 300 mingtasi ishlatiladi. Qolgan 1,4 mln kartalar qayerda? Agar nazariy jihatdan 400 ming karta buzilgan yoki yo‘qolgan deb oladigan bo‘lsak, yana 1 mln karta qoladi. Ular javonlarda yoki sotuvchilar va chayqovchilar qo‘lida yotibdi”, — dedi Davron Shoyoqubov.

ATTO transport kartalarining amal qilish muddati bekor qilindi

Kompaniya transport kartalarida amal qilish muddati ko‘rsatilgan bo‘lishiga qaramay, ularning amal qilish muddati yo‘qligini eslatib o‘tdi. Avtobuslarda naqd pul qabul qilishni to‘xtatish oldidan, yangi transport kartalariga bo‘lgan ehtiyojni kamaytirish maqsadida, ATTO barcha transport kartalari uchun amal qilish muddatini bekor qildi.