Fargʻonada ota farzandining 18 yoshigacha toʻlanadigan aliment pulini oldindan toʻladi
Byuroning davlat ijrochisi tomonidan 75 million soʻm aliment pullari hisoblab berildi.
1 daqiqa o‘qiladi
Fargʻona viloyati Fargʻona shahrida yashovchi ota farzandi uchun 18 yoshga toʻlguniga qadar toʻlashi kerak boʻlgan aliment pullarini avvaldan toʻlab qoʻydi.
Voqea qanday boʻlgan?
Maʼlum boʻlishicha, fuqarolik ishlari boʻyicha Fargʻona tumanlararo sudining ijro hujjatiga asosan qarzdor I.X. undiruvchi X.Q.ning foydasiga voyaga yetmagan bir nafar farzandining moddiy taʼminoti uchun aliment undirish belgilangan.
Taʼkidlanishicha, farzandlarining moddiy taʼminoti va majburiyatini anglagan qarzdor I.X. aliment toʻlash majburiyatini olgan boʻlsada, farzandining 18 yoshgacha boʻlgan aliment pullarini sobiq turmush oʻrtogʻi bilan oʻzaro kelishgan holda oldindan toʻlab berishini aytib, Majburiy ijro byurosining Fargʻona shahar boʻlimiga murojaat qilgan.
75 million soʻm
Byuroning davlat ijrochisi tomonidan hisoblab berilgan 75.564.625 soʻm aliment pullarini sobiq turmush oʻrtogʻi toʻliq olgandan soʻng hujjatlar rasmiylashtirilib, ijro hujjati tamomlandi.
