O‘zbekiston aholisi 37,5 mln. kishidan oshdi

O‘zbekiston aholisi har oyda o‘rtacha 61,7 ming kishiga, har kuni 2 ming kishiga ko‘paymoqda. 

Statistik ma’lumot

Statistika agentligi ma’lumotlariga ko‘ra, 2024-yil 27-noyabr holatiga O‘zbekiston doimiy aholisi soni 37 503 972 kishini tashkil etdi. 2024-yilning to‘qqiz oyida mamlakatimizda 693,9 ming nafar bola tug‘ildi. O‘tgan yilning shu davriga nisbatan bu ko‘rsatkich 23 mingtaga kamaygan.

Erkaklar ko‘pmi yoki ayollar?

Statistika agentligi 2024-yilning 30-oktyabr holatiga ko‘ra O‘zbekiston aholisi tahlilini taqdim etgandi. Unga ko‘ra, aholi tarkibidagi erkaklar soni ayollar sonidan 263,6 ming kishiga ko‘p. Ya’ni:

– Ayollar soni – 18 543 493 ming kishi;

– Erkaklar soni – 18 805 512 ming kishini tashkil qilgan. 2024-yilning 1-oktyabr holatiga doimiy aholi tarkibidagi erkaklar soni ayollar sonidan 263,6 ming kishiga ko‘p.

Millionlik o‘sishlar

O‘zbekistonning doimiy aholisi 2022-yil dekabrda 36 milliondan, 2024-yilning 22-aprel kuni esa 37 million kishidan oshgan edi. 2024-yilning fevraliga ko‘ra, respublikaning doimiy aholisi soni o‘tgan yilning mos davri bilan solishtirilganda 2,2 foizga ortgan bo‘lib, ularning 56,3 foizi mehnatga layoqatli yoshdagi fuqarolar hisoblanadi.