Toshkent aeroportida yo‘lovchilar uchun kutish hududi kengaytirildi

Uzbekistan Airports kompaniyasi matbuot xizmatining xabar berishicha, Toshkent xalqaro aeroporti uchish zalining “steril” hududi 2000 kvadrat metrga kengaytirildi. Bu umumiy zalni B5-B6-B7 chiqish yo‘laklari bilan ulash imkonini beradi. Ushbu hududda Hardee’s, Pizza Hut, La Croissanterie va Pinkberry brendlari mavjud fudkort ochiladi.

Ikkita yirik kompaniyalar bilan shartnomalar tuzilgan

Yangi maydon kutish zalidagi Art bazar savdo nuqtalarining chap tomonida ochildi. Loyihaga asosan, ushbu hududda o‘rindiqlar bilan jihozlangan keng kutish maydoni hamda fudkort tashkil etish ko‘zda tutilgan. Ayni paytda E-auksion platformasidagi savdolar natijalariga ko‘ra ikkita kompaniya bilan shartnomalar tuzildi, ulardan biri aeroportda The Border by Teriyaki restoranini, ikkinchisi o‘z hududida to‘rtta brendni: Hardee’s, Pizza Hut, La Croissanterie va Pinkberry’ni birlashtiradi. Yaqin kunlar ichida esa restoranlarning qurilishi boshlanadi. Hozircha fudkortga mo‘ljallangan joylar tez orada ish boshlaydigan brendlarning logotiplari tushirilgan bannerlar ortida yashiringan.

Aeroport ichida Caffelito tarmog‘ining qahva burchagi yo‘lovchilarga xizmat ko‘rsatmoqda

Hozirda yangi zalda o‘zbek Caffelito tarmog‘ining qahva burchagi joylashgan bo‘lib, u yerda yo‘lovchilar uchun issiq va sovuq ichimliklar, shirinliklar va yangi pishiriqlar taqdim etiladi.

Rekonstruksiyadan so‘ng pastki zaldan bortga chiqish mumkin bo‘ladi

Shuningdek, qo‘shimcha zalning qurilishi umumiy jo‘nash zalini B5-B6-B7 chiqish yo‘laklari bilan ulash imkonini berdi. Bundan tashqari, kelajakda kelayotgan va ketayotgan yo‘lovchilar oqimini ajratib turuvchi alohida galereya va pastki zaldan bortga chiqish yo‘laklarini ochish mumkin bo‘ladi, deya qayd etdi aeroport matbuot xizmati. Ma’lumot uchun, ayni paytda Toshkent aeroportida 2025-yil oxirigacha davom etadigan rekonstruksiya ishlari olib borilmoqda. Xalqaro aviaqatnovlar terminali maydoni ikki barobar kengayadi, jo‘nab ketish hududiga kirish yo‘llari o‘zgaradi, uchib kelish va uchib ketish zallari yagona majmuaga birlashtiriladi, terminalning ikkinchi qavatida ochiq terrasa qurilishi ko‘zda tutilgan.