Abituriyent qaysi holatlarda imtihondan chetlashtiriladi?

Joriy yilning 14-iyul kuni abituriyentlar uchun oliy ta’lim muassasasiga qabul imtihonlari boshlandi. Abituriyentlar faqatgina fanlarni yaxshi o‘zlashtirish emas, balki imtihon jarayonida belgilangan tartib-qoidalarga rioya qilishlari ham zarur. Vazirlar Mahkamasining tegishli (03.04.2018 yildagi 261-son) qarori bilan oliy ta’lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi belgilangan.

"Shpargalka" ishlatishga harakat qilsa

 Unga ko‘ra, quyidagi hollarda abituriyent test sinovlari jarayonidan chetlashtiriladi va natijalari chiqarilmasligiga asos bo‘ladi.

 Agar abituriyent test sinovlari o‘tkaziladigan hududga yoki binoga kirishda mikrokalkulyator, lug‘at, jadval, kitob, uyali telefon, kompyuter, telekommunikatsiya qurilmalari va boshqa vositalar, "shpargalka" olib kirishga harakat qilsa, olib kirgan bo‘lsa yoki ulardan test sinovlari davomida foydalansa, u imtihondan chetlashtiriladi.

Videokuzatuv orqali qoidalarga amal qilmagani aniqlansa

Shu bilan birga, test materiallarini boshqa abituriyentga uzatsa yoki yordam bersa, ularni binodan tashqariga olib chiqsa, test topshiriqlari kitobi varag‘ini yirtsa yoki test sinovlari uchun ajratilgan vaqt tugaganidan so‘ng test materiallarini topshirishdan bosh tortsa, jarayonda videokuzatuv orqali abituriyentning tartib va qoidalarga amal qilmaganligi aniqlansa ham testdan chetlashtirilishi va uning natijasi chiqarilmasligi mumkin.

Ruxsatsiz guruhdan chiqish ham chetlashtirishga asos bo'lishi mumkin 

Bundan tashqari, abituriyentning test sinovlarini topshirish vaqtida guruhdan chiqishi taqiqlanadi, chiqqan abituriyentlar qaytadan test sinovlariga qo‘yilmaydi. Test materiallarisiz, guruh nazoratchisi kuzatuvi ostida guruhdan chiqish hollari bundan mustasno.

Kechikib kelgan taqdirda-chi? 

Bu borada Oliy ta’lim, fan va innovatsiyalar vazirligi axborot xizmati rahbari Nazokat Abduqunduzova AOKAda bo'lib o'tgan brifingda fikr bildirib: “Imtihonga kechikish mumkin emas. Imtihonlarning boshlanish aniq vaqti abituriyent ruxsatnomasida yozilgan bo‘ladi. Shu bois, abituriyentlardan ruxsatnomada belgilangan muddat va manzilga imtihon boshlanishidan bir soat oldin yetib borishlari so‘raladi”, – degan edi.

Ma’lumot uchun, test sinovlari natijasidan norozi bo‘lgan abituriyent test sinovlari natijasi e’lon qilingan kundan boshlab o‘n besh kun davomida Davlat komissiyasi tomonidan tasdiqlangan apellyatsiya komissiyasiga yozma tartibda apellyatsiya shikoyati berish huquqiga ega.