Yengil sanoatning ishlab chiqarishdagi ulushi 14 %ni, eksportda esa 16 %ni tashkil qildi

Prezident Shavkat Mirziyoyev 12-dekabr kuni toʻqimachilik va charm sanoatidagi islohotlar natijadorligini yanada oshirish chora-tadbirlari boʻyicha yigʻilish oʻtkazdi. Maʼlumki, bu tarmoqlar aholi bandligi va eksportda katta oʻringa ega. Xususan, bunday korxonalarda 430 ming fuqaro ish bilan ta'minlangan. Yengil sanoatning jami ishlab chiqarishdagi ulushi 14 foizni, eksportda 16 foizni tashkil qiladi.

Eksport narxlari tushdi

Yigʻilishda qayd etilishicha, bugungi murakkab sharoitda tashqi bozordagi vaziyat tez oʻzgarayapti. Buning ta'sirida eksport narxlari ip kalavada 9 foizga, gazlamada 15 foizga, tayyor mahsulotda 13 foizga tushgan. Asosiy eksport bozorlarimizda tayyor mahsulot olish kamaygan.

Majlisda bu vaziyatga moslashib ishlash, ichki imkoniyatlarni toʻliq safarbar etish choralari muhokama qilindi.

Ip kalavani qayta ishlash darajasini 70 foizga yetkaziladi

Yanvar-noyabr oylarida toʻqimachilik eksporti 2,6 milliard dollarni tashkil qildi. Sohadagi imkoniyatlar hisobiga buni oshirish mumkinligi ta'kidlandi.

Jahon bozorida tola narxi pasayib borayotgan sharoitda tola va ip kalavani chuqur qayta ishlashni koʻpaytirish zarurligi qayd etildi. Buning uchun mato ishlab chiqarish va boʻyash korxonalarini qoʻshimcha qoʻllab-quvvatlash choralari belgilandi. Bu orqali ip kalavani qayta ishlash darajasini 70 foizga yetkazish vazifasi qoʻyildi.

Shu bilan birga, bu yil qoʻy va echki terisi eksportidan 10 foizlik yigʻim bekor qilingani natijasida 3 million dollarlik eksport shartnomalari tuzilgan. Buni kelasi yil ham davom ettirib, eksportni oshirish boʻyicha topshiriqlar berildi.

Charm sanoatida kadrlar yetishmovchiligi

Charm sanoatida bichuvchi, tikuvchi, kosib kabi oʻrta boʻgʻin kadrlari yetishmayotgani, bu yoʻnalishda yiliga bor-yoʻgʻi 167 nafar mutaxassis tayyorlanayotgani koʻrsatib oʻtildi. Shu bois, poyabzal ishlab chiqarish rivojlangan Andijon, Namangan, Fargʻona, Samarqand va Toshkent viloyatlaridagi etakchi korxonalarni texnikumlarga bogʻlab, “dual ta'lim”ni yoʻlga qoʻyish zarurligi aytildi.

82 ta yirik loyiha va 25 mingta ish oʻrni

Yigʻilishda kelgusi yilga moʻljallangan rejalar haqida ham axborot berildi.

Qayd etilganidek, yengil sanoat tarmogʻiga 2 milliard dollardan ortiq xorijiy investisiya jalb qilib, 82 ta yirik loyihani amalga oshirish hamda 25 mingta ish oʻrni yaratish koʻzda tutilgan. Toʻqimachilik mahsulotlari eksportini 4 milliard dollarga, charm mahsulotlari eksportini 250 million dollarga olib chiqish maqsad qilingan.