“Ўзбекистон почтаси” жўнатмалари ўғриланганини айтаётган америкалик аёл видеосига муносабат билдирди

Аввалроқ ижтимоий тармоқларда ўзини Жессика деб таништирган америкалик аёл “Ўзбекистон почтаси орқали юборган 1000 долларлик жўнатмасини ярми синган, қолган қисми ўғриланган ҳолда қабул қилиб олгани ҳақида видеолар тарқалганди. Ўзбекистон почтаси мазкур ҳолат юзасидан ўрганишлар олиб бориб, ўз муносабатини билдирди.

АҚШлик (Вашингтон штати) эканини айтиб, ўзини Жессика деб таништирган аёл, жорий йил сентябрь ойида Ўзбекистон Республикасидан қиймати 1000 АҚШ долларидан кам бўлмаган миқдордаги чинни бўйимлар солинган жўнатмаларни АҚШ манзили бўйича юборганлигини ва 5 октябр куни олганлигини ҳамда жўнатманинг бир қисми шикастланганлигини ва иккинчи жўнатма (ижтимоий тармоқларда ўғирланган деб талқин қилинаётган) йўқолганлигини маълум қилган.

Божҳона декларацияларини ўрганиш жараёнида “Ўзбекистон почтаси” АЖ томонидан жорий йилнинг сентябрь ойида Ўзбекистон Республикасидан АҚШ манзили бўйича 2 та қиймати эълон қилинган жўнатмада чинни буюмлар солинган идишлар юборилганлиги аниқланган.

Ушбу жўнатмалар Андижон вилоятида истиқомат қилувчи фуқаро Т.М томонидан АҚШнинг Вашингтон штатида таълим олувчи ўғли Э.Жга юборилган (Жессика ҳоним билан олувчи Э.Ж. ўртасидаги боғлиқлик бизга маълум эмас) бўлиб, жўнатмаларнинг ҳар бири 100 000 сўм (таъкидланаётган 1000 доллар.) миқдорида қиймати эълон қилинган.

Мазкур жўнатмаларни почта алоқаси объектида қабул қилиш жараёнида почта ҳодими томонидан мижозга жўнатмаларни узоқ масофага жўнатаётганлиги, унинг ичидаги жўнатмага шикаст етмайдиган равишда ўраш лозимлиги, акс ҳолда жўнатмаларга зарар етиши мумкинлиги тушунтирилган, шунингдек, қўшимча ҳақ эвазига маҳсус тарзда ўраш ҳизмати тавсия этилган, аммо мижоз ўзи томонидан ўралган ҳолда жўнатмаларни тақдим этган. Жўнатмаларни қабул қилиш жараёнининг видео ёзувлари мавжуд. Жессика ҳоним ўз видеосида жўнатмалар тегишли равишда ўралмаган ҳолда жўнатилса, шикаст етмасдан боришига кафолат берилмаслиги тўғрисида огоҳлантирилганлигини айтиб ўтган.

Шунингдек, Жессика ҳоним унга жўнатмалар бўйича трекинг учун штрих-код берилмаганлигини маълум қилган. Жўнатмалар бўйича трекинг учун штрих-код белгиланган қоидаларга мувофиқ жўнатувчига берилади, бу иловада келтирилган божҳона декларациясида кўрсатилган.

Жўнатувчига 2 та жўнатма учун берилган маҳсус штрих-код орқали жўнатмаларнинг юборилиш ҳолати почта жўнатмаларини кузатиш бўйича маҳсус сайт орқали ўрганиб чиқилганда, биринчи жўнатма 2020 йил 5 октябр куни олувчига топширилганлиги маълум бўлди. Шунингдек, ижтимоий тармоқларда иккинчиси ўғириланган деб такидланаётган жўнатма 6 октябрь куни олувчига топширилган, буни кузатиш бўйича маҳсус сайт тасдиқлайди.

Бугунги кунда, бутун дунёда пандемя муносабати билан авиа қатновлар баъзи бир давлатларга вақтинчалик тўхтатилган бўлиб, Ўзбекистон Республикасидан АҚШга тўғридан-тўғри авиа қатновлар йўқлиги сабабли жўнатмалар Сеул орқали АҚШга етказиб берилган.

“Мазкур ҳолатга ўхшаган вазиятлар дунёнинг бошқа мамлакатларидаги почта компаниялари тажрибасида ҳам учраб туради. Шу сабабли, мижозлар манфаатини ҳимоя қилиш мақсадида, Умумжаҳон почта иттифоқи Конвенсияси регламентининг 17-237-бандига мувофиқ, барча почта жўнатмалари ичидаги жўнатмага шикаст етмайдиган равишда қадоқланган, шунингдек, шиша ёки бошқа мўрт жўнатмалар почта қутиларига жойланган ва тегишли ҳимояланган материаллар билан ўралган ҳолда юборилиши лозимлиги белгиланган.

Шунингдек, Регламентга кўра жўнатмага шикаст етказилган ҳолатлар юз берган тақдирда, мижоз томонидан почта ҳизматларини кўрсатувчи компанияга расмий мурожаат қилиниши лозимлиги ва мурожаат белгиланган тартибда миллий почта оператори томонидан кўриб чиқилиши белгилаб қўйилган. АҚШда мазкур ҳолат юзасидан USPS компаниясига мурожаат этиш талаб этилади.

Юқоридагиларни инобатга олган ҳолда, Умумжаҳон почта иттифоқи Конвенсияси Регламентининг 22-бандига мувофиқ почта жўнатмаларини ҳизмат кўрсатувчи ташкилотлар томонидан юбориш жараёнида хатоликларга йўл қўйилганлиги аниқланса, белгиланган тартибда компенсасия тўлови ундирилиши кўрсатилган”, дейилади “Ўзбекистон почтаси” АЖ муносабатида.