Usmonovning boyligi $7,3 milliardga kamaydi

Bloomberg nashri dunyoning eng boy odamlari ro‘yxatini qayta tuzib chiqdi.

Birinchi o‘rinda Ilon Mask

Amerikalik biznesmen, Tesla va SpaceX asoschisi Ilon Mask o‘z rekordini yangiladi va yana dunyoning eng boy odamlari ro‘yxatida qaytadan birinchi o‘ringa chiqib oldi.

Qayd etilishicha, Maskning boyligi 348 milliard dollarni tashkil etib, tarixiy darajaga erishgan. Nashrning 2021 yilgi statistikasida 340,4 milliard rekord ham Mask tomonidan o‘rnatilgan.

Uning boyligi oshishi biznesmenning o‘ziga tegishli bo‘lgan Tesla kompaniyasi va sun’iy intellekt bo‘yicha AI startapining muvaffaqiyati bilan bog‘liq. Qolaversa, respublikachi Donald Trampning AQSH prezidentlik saylovidagi g‘alabasi ham tadbirkorning muvaffaqiyati va uning kompaniyalari daromadining o‘sishiga katta ta’sir ko‘rsatgan.

TOP-3

Ro‘yxatda ikkinchi o‘rinni Amazon asoschisi Jeff Bezos egallagan. Uning boyligi 219 milliard dollarni tashkil qiladi.

Uchinchi o‘rindan esa, Oraslye asoschisi va eng yirik aksiyadori Larri Ellison joy olgan. Uning jami boyligi 206 milliard dollarga baholangan.

Usmonovning boyligi $13,8 milliardga baholangan

Shuningdek, o‘zbekistonlik boʻlgan Rossiya milliarderi Alisher Usmonov Bloomberg agentligining eng boy 500 kishi roʻyxatida 174-oʻrinni egalladi.

24-noyabr holatiga ko‘ra, tadbirkorning boyligi $13,8 milliardga baholangan. Joriy yilning 11 oyida u $7,29 milliardga qisqardi.

Amerikaning Forbes nashri hisob-kitoblariga ko‘ra, 24-noyabr holatiga Usmonovning kapitali $14,2 milliardni tashkil etgan. Nashrning qayd etishicha, rossiyalik milliarder 2022-yildan buyon O‘zbekistonda istiqomat qiladi.