Uzoq yillik tanaffusdan so‘ng APL o‘yinlari O‘zbekistonda translyatsiya qilinishi mumkin

O‘zbekistonda sportga ixtisoslashgan yagona kanal mavjud — “Sport”. Yil avvalida esa ushbu telekanal qoshida aynan futbol o‘yinlarini namoyish qilishga ixtisoslashgan “Futbol” telekanali ochildi. Biroq 2024-yilda tomoshabinlar tomonidan talab yuqori bo‘luvchi futbol musobaqalari "Yevro-2024" va UEFA Chempionlar ligasi o‘yinlari “Zo‘r TV” musiqiy-ko‘ngilochar telekanali orqali translyatsiya qilindi. Oxirgi ma’lumotlarga ko‘ra, telekanal bu ishni yana davom ettirish payida. Abduqodir Husanov APLga ko‘chib o‘tgach, “Zo‘r TV” telekanali Angliya Premyer-ligasi o‘yinlarini O‘zbekistonda namoyish etish huquqini qo‘lga kiritgani haqida ma’lumotlar paydo bo‘ldi.

Yana “Zo‘r TV”  

Sharhlovchi Otabek Jo‘rayev o‘zining Telegramdagi sahifasida ma’lum qilishicha, O‘zbekistonda Angliya Premyer-ligasi tur doirasidagi ikkita o‘yini namoyish qiladi. “Zo‘r TV” APL doirasidagi Abduqodir Husanov ishtirokidagi o‘yinlarni namoyish etadi! APLning har turida “Zo‘r TV” tomonidan ikkita uchrashuv namoyish etiladi. Birinchi o‘yin bu, tushunarli — “Man Siti” o‘yini. Ikkinchisi esa “Liverpul”, “Arsenal”, “Chelsi”, “Manchester Yunayted”, “Tottenhem” yoki boshqa ingliz brendi ishtirokidagi o‘yin", — deb yozadi sharhlovchi.

Ma’lumot qisman tasdiqlandi

O‘zbekiston Futbol Assotsiatsiyasi media departamenti rahbari, sport sharhlovchisi va ayni shu kanal bilan o‘zaro hamkorlikda ish olib borayotgan Davron Fayziyev mavzuga munosabat bildirdi. “Bu ma’lumot hali rasmiy emas. Ha, “Zo‘r TV” bugungi kunda barcha futbol muxlislari ko‘rishni xohlayotgan “Siti” va Angliyaning boshqa top klublari o‘yinlarini namoyish etish uchun harakatda. Biz ham bu ijobiy hal bo‘lishini kutyapmiz”, — deb yozadi Fayziyev. Ma’lumot uchun, telekanalning bundan avvalgi UEFA Chempionlar ligasi 2024/25 yilgi mavsum o‘yinlari translyatsiyaga oid xabarni ham dastlab “Sport” telekanali sharhlovchisi Otabek Jo‘rayev ma’lum qilgan edi.

Telekanal YCHL doirasida haftada ikkitadan o‘yinni namoyish etib kelayotgan edi. Bunga qadar O‘zbekistonda xususiy telekanallardan “Uzreport TV” va “Futbol TV” (hozirda “F TV”) Top-5 chempionati o‘yilari huquqini xarid qilib, LaLiga hamda APL bahslari translyatsiyasini amalga oshirgan.