Rossiya Teleram'ni aprelda bloklamoqchi

Rossiya rasmiy doiralari Telegram messenjerini bloklash masalasida yakuniy qarorga kelgani aytilmoqda. RBK nashrining yuqori martabali manbalariga tayanib bergan xabariga ko‘ra, platforma faoliyatiga cheklovlar joriy yilning aprel oyi boshidan kuchga kirishi kutilmoqda.

Noqonuniy harakatlarga jalb qilish va vazirliklar qarori

Mazkur qaror vazirliklar darajasida jiddiy muhokama qilingani va Kremlga yaqin manbalar tomonidan yakuniy deb baholangani ma’lum qilingan. Cheklovlar joriy etilishiga messenjer orqali noqonuniy harakatlarni, xususan, voyaga yetmaganlarni turli jinoyatlarga jalb qilish holatlarining ko‘paygani asosiy sabab sifatida ko‘rsatilmoqda.

Front hududidagi faoliyat masalasi

Avvalroq Raqamli rivojlanish vaziri Maksut Shadayev messenjer faoliyatini maxsus harbiy operatsiya hududida cheklash rejalashtirilmayotganini ta’kidlagan bo‘lsa-da, RBK manbalari aprel oyidan boshlab Telegram faqat front hududida ishlashi mumkinligini istisno etmayapti.

Pavel Durovga nisbatan ayblovlar

Vaziyatning keskinlashuviga fevral oyida Rossiya ommaviy axborot vositalarida Telegram asoschisi Pavel Durovga nisbatan terrorchilik faoliyatiga ko‘maklashish ayblovi bilan jinoyat ishi qo‘zg‘atilgani haqidagi xabarlar ham zamin yaratdi. Rasmiylar platformadan ekstremistik mazmundagi kanallarni o‘chirishni talab qilgan, biroq mazkur talab bajarilmagan. O‘z navbatida, Pavel Durov ushbu ayblovlarni so‘z erkinligi va shaxsiy hayot daxlsizligiga nisbatan bosim deb hisoblaydi.

Yakuniy bloklash ehtimoli

Agar bloklash bo‘yicha qaror amalga oshsa, Telegram Rossiya hududida to‘liq yoki qisman ishlamay qolishi mumkin. Hozircha rasmiy idoralar bu borada ochiq bayonot bergani yo‘q.