O‘zbekiston terma jamoasi sardori A Seriya autsayderiga o‘tishi kutilmoqda

Insayder va jurnalist Janluka Di Marsio Eldor Shomurodov qishki transfer oynasining so‘nggi kunlarida Rim klubini tark etishi haqida yozdi.

“Empoli“ kurashdan chiqdi

Insayder va jurnalist Janluka Di Marsioning yozishicha, “Roma“ Eldor Shomurodov bo‘yicha “Venetsiya“ klubi taklifini qabul qilishga yaqin turibdi. Tomonlar kelishuvga erishish arafasida. Italiya A Seriyasida 19-o‘rinni egallab turgan venetsiyaliklar Shomurodov uchun kurashda “Empoli“ni ortda qoldirgan. Qayd etilishicha, “Roma“ o‘zbekistonlik hujumchisini sotib olish sharti bilan mavsum yakuniga qadar “Venetsiya“ga ijaraga beradi.

Odatga aylanayotgan hodisa

Umuman olganda Shomurodov 2021-yilning yozida Rim klubiga ko‘chib o‘tganidan beri har transfer oynasi arafasida “Roma”ni tark etishi haqida xabarlar tarqatiladi. Xususan, yozda ham klub 29 yoshli hujumchi bilan xayrlashishga yaqin turgandi, lekin o‘sha paytdagi bosh murabbiy Daniele De Rossi kutilmaganda Eldor haqidagi fikrini o‘zgartirib, uni jamoada olib qolgandi.

Ma’lumot uchun, 29 yoshli hujumchi joriy mavsum “Roma” tarkibida 15 o‘yin o‘tkazib, 2 ta gol urdi va 1 ta golga assistentlik qildi. Eldorning rimliklar bilan shartnomasi 2026-yilning 30-iyunigacha mo‘ljallangan.