Mirziyoyev ShHTni 2040-yilgacha rivojlantirish bo‘yicha yangi konsepsiya taklif qildi

Prezident Shavkat Mirziyoyev 1-sentyabr kuni Shanxay hamkorlik tashkiloti Davlat rahbarlari kengashi yig‘ilishida nutq so‘zlab, tashkilotning uzoq muddatli rivojlanishiga oid yangi tashabbuslarni ilgari surdi. Davlat rahbari, avvalo, Qirg‘iziston prezidenti Sadir Japarovga sammitni yuqori darajada tashkil etgani uchun minnatdorlik bildirdi. Shuningdek, qirg‘iz xalqini davlat suverenitetining 35 yilligi bilan tabrikladi.

ShHTning 25 yillik faoliyati

Shavkat Mirziyoyev ShHT tashkil etilganiga 25 yil to‘lganini qayd etdi. Uning ta’kidlashicha, tashkilot o‘tgan chorak asr davomida o‘zining zarurligi va samaradorligini namoyish eta olgan. O‘zbekiston ShHTni ochiq, bloklardan xoli va tinchliksevar hamkorlik platformasi sifatida rivojlantirishni qo‘llab-quvvatlab kelayotgani ta’kidlandi. Prezident xalqaro maydonda geosiyosiy bo‘linish, ishonch taqchilligi va mojarolar kuchayib borayotganiga e’tibor qaratdi. Ayniqsa, Yaqin Sharqdagi vaziyatdan xavotir bildirdi.

“Biz mintaqada muloqotni qayta tiklash va keskinlikni yumshatishning qat’iy tarafdorimiz”, — dedi Prezident.

ShHT-2040 konsepsiyasini ishlab chiqish taklifi

Davlatimiz rahbari tashkilot oldida turgan bugungi dolzarb masalalar bilan bir qatorda, ShHTning uzoq muddatli rivojlanish yo‘nalishlarini ham belgilab olish kerakligini ta’kidladi. Shu munosabat bilan O‘zbekiston “ShHT — 2040: umumiy taraqqiyot makoni” konseptual qarashini ishlab chiqishni taklif qildi. Ushbu konsepsiyaning asosiy maqsadi investitsiyalar, texnologiyalar va bilimlar erkin almashiladigan, yirik infratuzilma hamda sanoat loyihalari amalga oshiriladigan, davlatlar, biznes va aholi o‘rtasidagi to‘g‘ridan-to‘g‘ri aloqalar kengayadigan o‘zaro bog‘liq va barqaror makonni shakllantirishdan iborat bo‘lishi kerak.

Prezident ShHT mamlakatlarining ulkan inson, tabiiy, ishlab chiqarish va intellektual salohiyati, eng avvalo, aholi farovonligini oshirishga yo‘naltirilishi lozimligini qayd etdi.

Sanoat kooperatsiyasi va savdoni kengaytirish

O‘zbekistonda ShHT davlatlari bilan hamkorlikda 1500 dan ortiq qo‘shma loyiha amalga oshirilayotgani, o‘zaro savdo va investitsiyalar hajmi ortib borayotgani qayd etildi. Shavkat Mirziyoyev mavjud ijobiy dinamikani ko‘p tomonlama qo‘shilgan qiymat zanjirlarini rivojlantirishga yo‘naltirish zarurligini bildirdi. Buning uchun maxsus iqtisodiy zonalar, ishlab chiqarish jarayonlari, sotuv bozorlari va logistika tizimlarini birlashtiradigan ShHT Sanoat kooperatsiyasi xaritasini ishlab chiqish taklif qilindi. Shuningdek, ShHT Taraqqiyot bankini amalda ishga tushirishga o‘tish zarurligi ta’kidlandi. Tashkilotning Hukumat rahbarlari kengashiga transport, energetika, sanoat kooperatsiyasi va raqamli infratuzilma sohalaridagi ustuvor loyihalar portfelini shakllantirish bo‘yicha ishlarni boshlash taklif etildi.

Sun’iy intellekt bo‘yicha yangi hamkorlik

Prezident Xitoy Raisi Si Szinpinning sun’iy intellekt sohasida hamkorlik bo‘yicha butunjahon tashkilotini tashkil etish tashabbusini qo‘llab-quvvatladi.

“O‘ylaymanki, ShHT ushbu yangi texnologik alyansning birinchi hamkorlari qatorida bo‘lishi kerak”, — dedi Shavkat Mirziyoyev.

O‘zbekiston ShHTning ochiq ko‘p tilli ma’lumotlar korpusini shakllantirish bo‘yicha qaror qabul qilishni taklif qildi. Bundan tashqari, O‘zbekiston kelgusi yili Toshkentda ShHTning sun’iy intellekt va yangi raqamli yechimlar bo‘yicha forumini o‘tkazishga tayyor ekanini ma’lum qildi.

Suv, energetika va iqlim masalalari

Shavkat Mirziyoyev iqlim o‘zgarishi mamlakatlarning oziq-ovqat, suv va energetika xavfsizligiga tobora ko‘proq ta’sir ko‘rsatayotganini qayd etdi. Shu sababli ShHT doirasida ushbu yo‘nalishlar bo‘yicha yagona kun tartibini shakllantirish va maxsus mexanizm tashkil etish taklif qilindi. Shuningdek, 2035-yilgacha suv va energetika samaradorligi sohasida ShHTning texnologik hamkorlik dasturini ishlab chiqish tashabbusi ilgari surildi.