Toshkentda “Erta aniqlа – hayotni saqla” forumi o‘tkazildi

2025-yil 25-oktabr kuni Toshkent shahrida koʻkrak bezi va bachadon boʻyni saratoniga qarshi kurash oyi doirasidagi muhim tadbir – “Erta aniqlа – hayotni saqla” (“Erta tashxis hayotni saqlab qoladi”) forumi boʻlib oʻtdi. Unda 500 nafar yetakchi onkologlar, ginekologlar, tibbiyot mutaxassislari, xalqaro tashkilotlar va xususiy sektor vakillari hamda onkologik kasalliklarga chalingan ayollar ishtirok etdi.

Forum O‘zbekiston Respublikasi Prezidenti huzuridagi Strategik islohotlar agentligi, O‘zbekiston Respublikasi Sog‘liqni saqlash vazirligi va BMTning Aholishunoslik jamg‘armasi (UNFPA) tomonidan Yandex Uzbekistanning moliyaviy ko‘magida tashkil etildi.

Forumning asosiy maqsadi onkologik kasalliklarga chalingan ayollarga erta tashxis qoʻyish, davolash va yordam berishni takomillashtirishga qaratilgan ilgʻor tajribalar bilan almashish, muammolarni muhokama qilish va ularning amaliy yechimlarini topishdan iborat boʻldi.

Onkologik kasalliklarga qarshi kurash oyligining yakuniy tadbiri bo'lgan “Erta aniqlа – hayotni saqla” forumi hayotni saqlashdek ezgu maqsad yo'lida jamiyat, tibbiyot sohasi va ayollarni birlashtiruvchi ramzga aylandi. Chunki, erta tashxis qoʻyish - hayotni saqlab qolish demakdir.

Oktabr oyida kampaniya davomida bepul tibbiy koʻriklar tashkil etildi, shuningdek Korzinka, Safia, Bon, Kimmy Lab, Oʻzbechka goʻzallik salonlari kabi tarmoqlar ishtirokida keng qamrovli targʻibot ishlari olib borildi. Bundan tashqari, BMT Aholishunoslik jamgʻarmasi (UNFPA) koʻmagida universitetlarda ochiq maʼruzalar hamda jurnalistlar uchun treninglar oʻtkazildi.

Forumda O‘zbekistonning yetakchi mutaxassislari bilan bir qatorda Rossiya, Turkiya va Gruziya kabi davlatlarning nufuzli onkologiya markazlari hamda xalqaro tashkilotlaridan taklif etilgan ekspertlar ham ishtirok etdi. Bundan tashqari, anjuman doirasida bemorlar uchun onkologiya maktabi, turli maslahat sessiyalari va mini-treninglar, shifokorlar uchun esa ko‘krak bezi va bachadon bo‘yni saratonini erta aniqlash va davolash usullari bo‘yicha mahorat darslari tashkil etildi.

Forumning samimiy va erkin muhiti uning barcha ishtirokchilariga, xoh bemor bo'lsin, xoh mutaxassis, o'z fikrlarini teng huquqli tarzda bildirish imkonini berdi va tadbirga insoniylik ruhini olib kirdi.

Forum zallarida quyidagi tematik hududlar tashkil etildi:

- Ko‘krak bezi saratonidan davolanayotgan yoki sog‘aygan ayollarga bagʻishlangan “Tana. Vaqt. Hayot” fotoko‘rgazmasi. Loyiha muallifi - ushbu tashxis bilan yuzlashgan fotograf Natalya Ilina.

- “O‘zbechka" saloni bilan hamkorlikdagi “O‘zgarish” loyihasi. Onkologik kasallik bilan kurashayotgan ayollar bir kunini parvarish, g‘amxo‘rlik va qo'llab-quvvatlash muhitida o‘tkazib, go‘zallik –bu hayot, qabul qilish va kuch ekanligini yana bir bor his qilish imkoniyatiga ega bo‘ldilar.

- Forumda koʻkrak bezi saratonidan davolanayotgan ayollar uchun bepul onkopsixologik yordam dasturi ishga tushirildi. Noyabr oyidan yanvar oyigacha bepul onlayn va oflayn seminarlar, guruh mashgʻulotlari va art-terapiya oʻtkaziladi.

- Aholining xabardorligini oshirish maqsadida onkologik kasalliklarni erta aniqlash, oldini olish va bemorlarni qoʻllab-quvvatlash boʻyicha ishonchli ma'lumotlar jamlangan portal ishga tushirildi. Shuningdek, bemorlar va shifokorlar ishtirokida 12 qismdan iborat podkastlar seriyasi ham yaratildi.

Bu sa’y-harakatlarning barchasi O'zbekistonda yashovchi har bir ayol o‘z salomatligi haqida oʻz vaqtida qaygʻurib, hayotini asrab qolishiga qaratilgan.

Strategik islohotlar agentligi tashabbusi bilan olis hududlar aholisining tibbiy xizmatlardan foydalanish imkoniyatlarini kengaytirish maqsadida xalqaro grant mablag‘lari hisobidan mamlakatimizga yangi beshta zamonaviy mammograf olib kelindi. Bundan tashqari, ko‘krak bezi saratoniga chalingan bemorlarga yordam ko‘rsatish sifatini oshirish maqsadida o‘zbekistonlik shifokorlar guruhi AQSHning yetakchi onkologiya markazida multidisiplinar jamoaviy ish uslubini o‘rganish bo‘yicha stajirovkada qatnashadi.

Forum O‘zbekiston Respublikasi Prezidentining 2024-yil 22-noyabrdagi “Ayollar orasida onkologik kasalliklarni nazorat qilish tizimini takomillashtirish chora-tadbirlari to‘g‘risida”gi qaroriga muvofiq tashkil etildi. Mazkur qarorga asosan 2025-2030-yillarga moʻljallangan bachadon boʻyni va koʻkrak bezi saratonini nazorat qilish dasturi tasdiqlangan bo‘lib, dastur ayollar orasida onkologik kasalliklarni erta aniqlash va davolash boʻyicha tizimli chora-tadbirlarni joriy etish, skrining dasturlarini kengaytirish, aholi xabardorligini oshirish, tibbiy asbob-uskunalarni modernizatsiya qilish va tibbiyot xodimlarining professional salohiyatini rivojlantirishga qaratilgan.

Erta tashxis - bu hayot uchun kurashish imkoniyati! Muntazam tibbiy koʻriklar, ogohlik va e’tibor ayollar oʻrtasida saraton kasalligining oldini olish va hayotni asrab qolishning kalitidir.

Ijtimoiy hamkorlik asosida