Afg‘oniston bilan qurolli to‘qnashuvlarni davom ettirayotgan Pokiston Bosh vaziri qay maqsadda O‘zbekistonga kelmoqda?

The News International manbasi Pokiston Bosh vaziri Shahboz Sharif joriy yilning fevral oyida O‘zbekistonga kelmoqchi ekanligini ma’lum qildi. 

Muzokaralar mavzusi

Mavjud ma’lumotlarga ko‘ra, Pokiston ikki davlat o‘rtasidagi iqtisodiy hamkorlikka oid bir qator bitimlarni imzolaydi. Pokiston “Markaziy Osiyoga nazar” siyosatiga muvofiq, Markaziy Osiyo davlatlari bilan aloqalarni kuchaytirishni faollashtirmoqda va Kavkazning muhim mamlakatlari bilan aloqalarni kengaytirmoqda. Bosh vazir Shahboz Sharif fevral oyining uchinchi haftasida Ozarbayjon va O‘zbekistonga keladi. Uning safaridan senator Muhammad Ishoq Dar boshchiligidagi Bosh vazirning o‘rinbosari, Tashqi ishlar vaziri hamda bir qator muhim federal vazirlar ham qatnashadi. Shuningdek, bosh vazir bilan birga biznes hamjamiyatidan iborat delegatsiya ham safarda ishtirok etadi. Bosh vazir O‘zbekistonda ikki kun bo‘lib, o‘ziga xos tashabbuslarni ilgari suradi. U O‘zbekistonga Karachi portidan tranzit savdo uchun foydalanishni taklif etadi va muhim savdo bitimlarini imzolaydi.

Transafg‘on temiryo‘li

O‘zbekistondan Pokistonning Karachi portiga yuklarni yetkazish uchun temiryo‘l kerak va u Afg‘oniston hududidan o‘tadi. O‘zbekiston hisob-kitoblariga ko‘ra, Afg‘oniston orqali o‘tadigan 760 km temiryo‘l Pokistonga yuklarni yetkazib berish muddatini taxminan besh kunga, transport xarajatlarini esa kamida 40 foizga qisqartiradi. Taxminlarga ko‘ra, qiymati 6 milliard dollargacha bo‘lgan loyiha 2027-yil oxirigacha yakunlanadi, 2030-yilgacha poyezdlar Transafg‘on temiryo‘li bo‘ylab yiliga 15 million tonnagacha yuk tashish imkoniyatiga ega bo‘ladi. Yangi temiryo‘l yo‘nalishi Yevropa Ittifoqi mamlakatlari, Rossiya, O‘zbekiston va Afg‘onistonni Yaqin Sharq va Janubi-Sharqiy Osiyo mamlakatlariga tovarlar eksport qilish uchun Arab dengizidagi Pokiston portlari bilan bog‘laydi.