“Cho‘kayotgan sherlar“ Masharipov jamoasiga qarshi: “Istiqlol” - “Paxtakor” (prevyu)

Bugun, 25-noyabr kuni Elit Chempionlar Ligasi 5-turida “Paxtakor” Dubayda Eronning “Istiqlol” jamoasiga qarshi maydonga tushadi.

O‘zaro o‘yinlar tarixi va raqib haqida

“Paxtakor” Eronning ushbu jamoasi bilan 2011-yil guruh bosqichida to‘qnash kelgan. Tehronda o‘tgan o‘yin “Istiqlol” foydasiga — 4:2, Toshkentdagisi esa — “Paxtakor” (2:1) hisobiga g‘alaba bilan yakunlangan. 2020-yilgi Dohadagi nimchorak finalida “sherlar” 2:1 hisobida zafar quchgan. “Istiqlol” 9 marta Eron chempionati va 7 bor Eron Kubogida zafar quchgan. Ular oxirgi marta 2022-yil Eron chempioniga aylangan. Jamoani ushbu yildan janubiy afrikalik mutaxassis Pitso Mosimane boshqarmoqda. O‘zbekiston terma jamoasi yetakchilaridan biri Jaloliddin Masharipov ham ayni paytda ushbu jamoa safida to‘p tepmoqda.

Eron klublariga qarshi o‘yinlar

Poytaxt jamoasi Osiyo klublari musobaqalarida Eron jamoalari bilan 26 marta to‘qnash kelgan. Bugungi kunga qadar “sherlar” forslarga qarshi jami 26 bellashuvning 14 tasida zafar quchgan. Shuningdek, besh o‘yinda durang qayd etilib, raqiblar 7 bor g‘alaba qozongan. Raqib darvozasiga 36 to‘p kiritilib, 28 gol o‘tkazib yuborilgan. Toshkentdagi 10 uchrashuvning barchasida poytaxt jamoasi ustun kelgan.

Eron jamoalariga qarshi o‘yinlardagi natijalar

• “Zobaxan” - 2:0, 0:1
• “Naft” - 2:1, 1:1
• “Saba” - 2:1, 2:0
• “Sepaxan” - 2:1, 0:2, 1:3, 1:2
• “Traktorsozi” - 1:0, 0:2, 3:3, 0:0
• “Fulad” - 2:0, 3:1
• “Istiqlol” - 2:1, 2:4, 2:1
• “Persepolis” - 1:0, 1:1, 1:0, 0:2, 1:1
• “Shahr Xodro” - 3:0, 1:0