Toshkentdagi otliq parad qanday o‘tdi? — fotoreportaj

Kecha, 14-mart kuni Toshkent shahrining Amir Temur shohko‘chasi bo‘ylab Navro‘z umumxalq bayramiga bag‘ishlangan kavaleriya bo‘linmalarining tantanali yurishi bo‘lib o‘tdi.

Mazkur paradda mamlakatimiz Qurolli Kuchlari, Ichki ishlar vazirligi hamda boshqa huquqni muhofaza qiluvchi organlar tarkibidagi otliq bo‘linmalar ishtirok etdi. Harbiy xizmatchilar va xodimlar belgilangan tantanali liboslarda, otlar esa maxsus anjomlar bilan jihozlangan holda saf tortib, poytaxtning markaziy ko‘chalaridan biri bo‘ylab harakatlandilar.

Milliy gvardiya mutasaddilarining tushuntirishicha, ushbu ommaviy tadbir bir necha muhim maqsadlarni ko‘zlaydi. Xususan, u milliy an’analarni targ‘ib qilish, yoshlar o‘rtasida vatanparvarlik tuyg‘usini mustahkamlash hamda Navro‘z ayyomi arafasida aholi va poytaxt mehmonlari uchun bayram muhitini yaratishga xizmat qiladi.

Tantanali yurishni shahar aholisi va sayyohlar Amir Temur shohko‘chasi bo‘ylab bevosita kuzatib borish imkoniyatiga ega bo‘ldilar.